Shillong, Nohprah 10 : Ka Meghalaya Age Limited kaba dei ka kompani jong ka Tnad Planning bad ki Heh Ophisar ka Sorkar Jylla, kila mudui da ka mukotduma bai mynrain khmat (defamation case) pyrshah ia u Nongaiktien ka All India Trinamool Congress (AITC) Saket Gokhale namar ka jingkynnoh bamsap ia ka song pisa ba kot haduh T.632 klur bala mang ban pyntreikam iaka Meghalaya Eco Tourism Infrasture Development Project (MEIDP).
Ia kane la pyntip da u Commissioner & Secretary ka Tnad Planning ha ka kyrwoh bala phah hynne ka sngi saitjain, uba la pyntip ruh ba ka Sorkar Jylla ka dang shong bishar ban mudui lang da ka mukotduma bai mynrainkhmat pyrshah ia une u Nongialam ka AITC namar ki jingiai kynnoh lamler, jingkynnoh bym shongnongnia, jingkynnoh pynthohbria lyngba ki lad pathai khubor, kaba la pynjah burom ia ka ijot ka burom jong ka Sorkar Jylla bad ki Heh Ophisar.
Lah ban kdew hangne ba u Gokhale ha ka 4 tarik Nohprah, ula pynmih ia ka kyrwoh lyngba ki lad pathai khubor ba kynnoh ba u Myntri Rangbah ka Jylla Conrad K Sangma bad u Commissioner & Secretary ka Tnad Planning Dr D Vijay Kumar, kila pyndonkam bakla ia ka pisa ba kot T. 632 klur lyngba ka kompani Meghalaya Age Limited ban pyntreikam ia ka MEIDP.
“Ka Meghalaya Age Limited, kala mudui ia ka mukotduma bad phah tuklar ia ka IIngkashari u Chief Judicial Magistrate ka East Khasi Hills kat kum ka kyndon 200 pule lang bad ka kyndon 190 jong ka Criminal Procedure Code, 1973, ban ai ka jingpynsajia ia u Saket Gokhale namar ka jingpynthohbria bymman kat kum ka kyndon 499, ba pynsajia kat kum ka kyndon 500 jong ka Indian Penal Code, 1860” ong ka kyrwoh na u Commissioner & Secretary.
Ula ong ruh ba kat kum kane ka mudui, ki jingkynthoh jong u Saket Gokhale ka khring ruh ia ka jingtian bishar kat kum ka kyndon 505 jong ka IPC kaba dei bad ka jingialam bakla ia u paidbah.
Haba pyntip ba ka Meghalaya Age Limited ka dei ka kompani ka Sorkar Jylla ba treikam hapoh jong ka Tnad Planning ia kaba la pynkha kat kum ka kyndon 2 (45) jong ka Companies Act, 2013, u Commissioner & Secretary ula ong “La seng ia kane ka kompani tang ban pyntreikam ia ki project kiba wan pisa na shabar (Externally aided project), ban kyntiew ia ki kam jngohkai, ban pynlong ia ki tamasa ba iadei bad ka kam jngohkai, pynlong ia ki jingialang ban pynneh pynsah ia ki nongkynti/jingtei bala rim (Heritage) ha ka Jylla Meghalaya”.
“Ka jingmudui ka kdew ba u Gokhale u dei uba ju mlien ban kynnoh briew bad bym da khein snep ia ka lynti jong ka ain bad u dei uba bna nam ruh halor ka jingpynmih ia ki jingkynnoh lamler pyrshah ia ki Nongmihkhmat bad ki Heh Sorkar” ong une u Heh Ophisar ka Jylla.
Kat kum ka jingong jong u, ka Iingkashari Delhi High Court ha u snem 2021, kala kynthoh tyngeh pyrshah ia u (Gokhale) namar kijuh ki rukom kynnoh pynjah burom pyrshah ia ki Shakri Sorkar. U ong ba kane ka Iingkashari kala bthah ruh ba u Gokhale u dei ban da wad bniah shuwa ia kiei kiei baroh hashuwa ban pynmih ia kine ki jingkynnoh bad ba ula dei ruh ban da pan jingpynshai na ki briew kiba u kynnoh pyrshah.
Ka jingujor kala kdew ruh ba une u nongshah mudui (Gokhale) u dei uba dang shu shah kem dang shen ha ki Pulit ka Gujarat namar ka jingpyllait ia ka khubor thok ba iadei bad ka jingjia ba sngewsih ha ka Jylla Gujarat.
U Commissioner & Secretary ka Tnad Planning ula pynpaw ruh ha ka jingujor ba jin u (Gokhale) ula pan jingpynshai naka Meghalaya Age Limited kat kum ka hukum jong ka Delhi High Court, kan jin da pynpaw ba kine ki jingkynnoh ki dei kiba khlem nongrim bad ki bym shongnia.
Une u Heh Ophisar ula kdew ruh ba kine ki jingkynnoh lamler pyrshah ia ka Meghalaya Age Limited ka lah ban ktah jur hadien habud ha ka jingpyrshang ban pynioh ia ki project ba ioh pisa na shabar ka Jylla na ki kynhun bapher bapher.
“Kane kan sa ktah jur ia ka buit wanrah kam pynroi jong ka Jylla kaba long da kaba wanrah ia ki jingkynshew pisa lyngba ki project ba wan pisa na shabar ha kaba lah thaw ia ki lad aikam iajam bad ban kyntiew ia ka ioh ka kot hapoh ka Jylla” ula ong haba bynrap “Lah ban kdew ba hapoh ka Externally Aided Project bala pyntreikam ha ki Jylla Shatei Lam Mihngi, ka Sorkar India ka pyllait haduh 90% ka song pisa kum ka grant sha ka Sorkar Jylla.
