Guwahati, Nohprah 08 :Khnang ban lah ban pynneh ia ka shongsuk shongsain ha ka jylla ha ka rukom kaba kham paka, na ka liang ka kynhun myntri ka Assam hynnin ka 7 tarik Nohprah 2022 kala shim ia ka rai ban tei haduh 162 tylli ki police station kiba thymmai, ong u Myntri Rangbah (CM) Himanta Biswa Sarma.
Ia kane u CM Sarma ula pynpaw haba aijingkren ha ka jingialang bad ki lad pathai khubor hadien katei ka jingialang.
“Ka sorkar kan mang haduh T.532 klur na ka bynta ka jingtei ia ki 162 tylli ki police station kiba thymmai,” ong shuh shuh u Sarma.Nalor kata ula ong ruh ba ha Palasbari, ka police station kan don ruh ia ki quarter ha ki bynta ba shalor eh jong ka building.
Nalor kane u Sarma ula ong ruh ba na ka liang ka sorkar jylla kan ai ia ka jingiarap pisa kaba man la u bnai kaba long T.700 shi bnai sha ki longkmie kiba la jan ioh khunlung bad kiba trei hapoh ki tnat sorkar jylla.
Nalor kata ka kynhun myntri kala ai ruh ka jingmynjur ban kynthup ia 40 lak ngut ki nongioh jingmyntoi lyngba ka National Food Security Act (NFSA), kata nalor ka jingai jingmynjur na ka bynta ban pynioh ia ki rashon card bathymmai na ka bynta ki nongshong shnong kiba dang dei ban ioh thymmai.Katkum ka kynhun myntri, kane kan pynthikna ha kaba iadei bad ki jingioh jingmyntoi ha ka liang ka bam ka dih na ka bynta kito ki longiing kiba kham duna ha ka liang ka ioh ka kot.
Ka kynhun myntri kala mynjur ruh ban thaw ia ka 3rd Assam Forest Protection Force Battalion ka ban hap hapoh ka Assam Forests Protection Force Act, 1986 khnang ban lah ban aijingiada ia ki khlaw ki btap ia ki jingdon jingem kiba don hapoh jong ka.
Shuh shuh ka kynhun myntri kala shim ruh ia ka rai ban pynkylla ia ka Policy Academy ha Dergaon kum ka Lachit Barphukan Police Academy kum shibynta ban kynmaw burom ia u riewshlur ki Ahom u General Lachit Barphukan.
Kiwei pat ki jingshim rai jong ka kynhun myntri ki kynthup halor ka jingweng noh ia ki optional subjects na ka combined competitive (Mains) examination ia kaba yn pynlong da ka Assam Public Service Commission (APSC) khnang ban weng noh ia ki jingeh kiba iadei bad ki jingkylli ha ki optional subject bapher bapher.
