Itanagar, Nohprah 06 : Ha ka jingtreikam kaba khlem da pynslem ba la shim da ki bor pulit ka district Rupa ka Arunachal Pradesh la ioh ban pyllait pat ia u heh ka tnat forest uba la shah rahbor tang hapoh ka saw kynta, bad baroh ki nong rahbor kila shah kem noh ha ka jingjia kaba la jia hynnin ka sngi Nyngkong.
Katkum ki khubor la iathuh ba u ophis ka tnat forest ka district Rupa, u Bittem Darrang la kynnoh ba ula shah rahbor noh ha ki briew ki bym lah ban ithuh na ka iingsah jong u ha ka por kumba 1 baje nohphai sngi ha ka 5 tarik mynta u bnai.
Kumta ruh na ka liang ki pulit ka district mardor kila pynlong ka jingthwet kaba jur ryngkat ka jingpynap shrip ha ki lynti iaid ia kiba ki nongrahbor ki lah ban pyndonkam ha kaba rahbor ia une u DFO.
Ki jingtip kiba iadei bad ka kali Kia kaba dark blue ka bym don ia u nombor plate kumjuh ia ka dur jong u DFO ka Rupa la pynphriang sha baroh ki jaka ap pahara ha Bhalukpong, Bana bad Balemu.
Hynrei, ha ka por kumba 5 baje janmiet, na ka liang u Superintendent of Police ka Seppa, u Rahul ula pyntip ba katei ka kynhun kaba la shah kynnoh donkti kala shah bat noh hapoh ka jaka ap pahara ha bana ha kaba la lah ban pyllait noh ia utei u DFO na katei ka kali kaba ula shah rahbor.
Nalor kata la ioh ruh ban kurup ia kawei pat ka kali innova ka bym don nombor plate na kitei ki nong rahbor.Ia kine ki briew kiba la shah kynnoh donkti la ithuh kum u Michael Tajo (33), Joy Flago (29), Monuruddin Ali (33), Shamsul Ali (26), Sicilia Takam Tajo (35). baroh ki ki ki nongshong shnong ka Arunachal Pradesh.
