Agartala, Nohprah 06 :U Chairman ka TIPRA Motha u Pradyot Kishore Manikya Debbarma hynnin ka sngi Nyngkong ula kynthoh tyngeh ia ka sorkar da kaba kam ba wat hadien 70 tylli ki snem jong ka jinglaitluid hynrei ki trai shnong riewlum ka Tripura ki dang iai shah pynbor ban im kum ki nongkhrong ha la ka jong ka jaka puta.
U Pradyot hynnin ka sngi ula plie ia ka jingiaid paidbah ba la tip kum ka ‘Delhi Chari Delhi Bharo Abhiyan’ hakhmat ka Jantar Mantar na ka bynta ban dawa ia ka ‘Greater Tipraland’ kata ka jingpynbeit kaba neh katkum ki riti synshar ri khnang ba ki trai shnong riewlum ka Tripura kin dang im bad iai neh.
“Kaba kum kane ka jingiakhih kaba paidbah briew hakhamt Jantar Mantar ka dei kaba lah ban leh tang da ka TIPRA Motha bad ym da kiwei pat.Ngi la wan sha Delhi na Tripura kaba la ai shibun bah kiei kiei sha ka ri hynrei ki khun ki kti jong kane ka khyndew mynta ki hap ban iakhun na ka bynta la ki jong ki hok, na ka bynta ban ioh im bad na ka bynta ban dang iai sah ha ka sla khyndew bad kane kam long pyrshah ia kino kino ki kynhun nongshong shnong.Ngi iakhun na ka bynta ka lawei ki briew ki jong ngi. Kiba bun ki briew ki lah ban pyrkhat ba ki briew kiba wan sha Delhi ki dei ki lehnoh lane kiba long pyrshah ia ka ri, hynrei kalong kaba bakla, ki jaidbynriew Tiprasa ki ieit ia ka India bad ngi kwah ban pynpaw ba lada don mano mano ruh ha ka bor ki dei ban pyrkhat na ka bynta ki Tiprasa bad na ka bynta ka jylla Tripura,” ong u Pradyot.
Nalor kata ula ong ruh ba un ym ia peitn na ka bynta ki hok bad ka jingioh im jong ki trai shnong riewlum ka Tripura.
“Ngi lah ban iap hynrei ngin ym ia pein na ka bynta ki hok jong ki nongshong shnong kiba dei ki trai shnong ka Tripura.Haba Nga wan sha Delhi ha kine ki khyndiat bnai ba la dep, ki briew kila ong ba ngin leit ban iasynrop bad ngin ym rah ia ka mat kaba iadei bad ka jingdawa ‘Greater Tipraland’ hynrei tang ar bnai shwa ka ilekshon assembly ngi la wan biang sha kane ka nongbah ban dawa na ka bynta ka ‘Greater Tipraland.’ Lah 70 snem kynthih ngi la shah iehbein ha baroh ki liang.Ki nongshong shnong ki dang iai mad ia ka jingkyrduh um, ka jingeh kaba iadei bad ki surok, ka jingbym don skul bad ka jingkyrduh kam kyrduh jam.Mynta ngi la im kum ki nongkhrong hala ka jong ka jylla bad ha la ka jong ka khyndew ka shyiap.Hynrei, ha kane ka kynti kaba mynta ki trai shnong riewlum ka jylla kin ym sngap jar bad kin ioh ia ka jubab kaba dei biang.Ki don ia ka pisa hynrei Nga don ia ka jingiatylli,” ong shuh shuh u Pradyot.
U Pradyot ula ong ruh ba lashai ka sngi un phah ia ka memorandum sha ka MHA bad kan ym iakynduh ia kino kino ki nongialam katba kim pat ioh ia ka jingpynthikna halor ki jingdawa ia ki hok ki jong ki.
“Kan ym don kano kano ka jingiateh bad ka BJP, CPIM, Congress, TMC. Ngi long kiba kloi ban ia aireng ha kane ka jingialeh na ka bynta ban ioh im bad ban dang ioh iai sah,” ong u Pradyot.Haduh palat 1400 ngut ki nongtrei bad ki nongialam kila mih na Tripura ban leit sha Delhi na ka bynta ka jingiakhih ba jar jar kaba ar sngi kynthih ban dawa na ka bynta ka ‘Greater Tipraland.’
