Shillong, Nohprah 06: Ki Nonghikai College ba ioh jingiarap naka sorkar jylla hynne ka sngi ba-ar, kila ai khublei iaka Meghalaya High Court halor ka rai ban pyndam noh iaka hukum ban khanglad iaki nonghikai (Professor) ban shim bynta ha ka sain hima.
Haba kren sha ki lad pathai khubor u bah Brightstarwel Marbaniang u la ong ba ka sorkar Meghalaya naduh u snem 2018 kala wanrah iaka State Education Policy ban khanglad iaki Nonghikai ban shim bynta ha ka sain hima (Politics).
U bah Brightstarwel u la iathuh dei ha u snem 2021 ka kynhun Myntri ka sorkar jylla kala mynjur iaki kyndon (Rules) bad ha kine ki kyndon la batai shai ba la khang iaki nonghikai (Professor) ban shim bynta ha ka sain hima (Politics).
“Ha u bnai Jylliew 2021, ngi ki 6 ngut ki Nonghikai (Professor) jong ki College ba ioh jingiarap naka sorkar ngi la ujor hapoh ka Meghalaya High Court bad dei ha ka 5 tarik mynta u bnai ka ingbishar kala pynduh pyndam syndon ia kane ka jingpyntip ne Notification jong ka sorkar” la ong u bah Brightstar.
U bah Bright u la iathuh ba naka liang ki Nonghikai kim banse ban leit ujor sha ing bishar ha u snem 2021 namar naka liang u Symbud Myntri Rangbah ka jylla u la kren shai ba lada ki nonghikai ki thut ia kane ka jingpyntip ne Notification ki lah ban leit ujor sha ing kashari.
U la ong ba kane ka jingpyntip (Notification) jong ka sorkar jylla ka long ka jingiuh roit iaka hok long briew namar ia kane ka hok la ithuh daka riti synshar ka ri India.
