Shillong, Nohprah 06: Ka Maitshaphrang Movement hynne ka sngi kala dawa naka sorkar India bad sorkar ban ithuh kyrpang noh iaka riew khraw ka jylla Meghalaya ka Phan Nonglait.
Haba kren sha ki lad pathai khubor u Convener ka Maitshaphrang Movement u bah Micheal Syiem u la ong ba ka sorkar India ka donkam ban ithuh kyrpang noh iaka Phan Nonglait kum kawei na ki nongialeh laitluid ka ri India bad ka jylla Meghalaya baroh kawei.
U bah Micheal u la ong ba ka Maitshaphrang ka dawa ruh ba ka sorkar Meghalaya kadei ban pynbna noh ban thaw daka Khusnam ‘Ka Phan Nonglait Award’ ban sam sha ki riew paw jong ka jylla Meghalaya.
“Kum shi bynta ban ithuh kyrpang iaka Phan Nonglait, ka Maitshaphrang ka dawa naka sorkar India bad sorkar Meghalaya ban pynbna noh iaka 6 tarik Nohprah man u snem kum ka ‘Phan Nonglait Day’ ha baroh kawei ka ri” la ong u bah Micheal.
U bah Micheal u la ong ba ka Phan Nonglait ka long ka nuksa ban ai mynsiem ia ka jaitbynriew ba rit paid ka ba la ieng ban ialeh pyrshah ia ki shipai phareng kiba wan leh donbor iaki paidbah ka jylla.
Lah ban kdew ba ka Phan Nonglait kadei kawei na ki riewkynthei ba nyngkong kaba la don bynta lang ha ka jingiakhun ban ïoh ia ka jinglaitluid ha ryngkat u Syiem Tirot Sing.
