Shillong, Nohprah 05 : Ka Sorkar Jylla kala byrngem ban ujor da ka mukotduma pyrshah ia u Nongaiktien ka All India Trinamool Congress (AITC) Saket Gokhale halor ka jingkynnoh ba ka don ka jingbamsap jong ka Sorkar ba kot haduh T. 632 klur bala mang sha ka Meghalaya Ecotourism Infrastructure Development Project.
“Ka Sorkar Jylla kala khmih ia kane ka kam kum ka kam ba khia bha bad ka dang shong pyrkhat ban ujor noh da ka mukotduma ia u nongai ia ka kyrwoh khubor (Saket Gokhale) halor ka jingpynjah burom” ong ka kyrwoh na u Commissioner and Secretary ka Tnad Planning hynne ka sngi nyngkong.
Kala ong ba ka Sorkar Jylla ka kyntait war ia baroh ki jingkam kiba shu thaw hi bad ka bym don ia ki jingshisha. U Nongai (AITC) ia kane ka kyrwoh ula pynmih ia ki jingkam thok ha ki por bala leit bad ka paw ba ka jingthmu jong u ka ha lyndet kane ka kyrwoh ba mynta ka long tang ban ialam bakla ia u paidbah.
“Nalor kane, u Nongai (Gokhale) ia kane ka kyrwoh um pat ju wan iakren bad ka Sorkar lane ki Agency jong u ba kin pan ia ki jingtip lane pyndonkam ia kino kino ki jingtip ba iatip paidbah kynthup ia kito kiba naka https://meghalayatenders.gov.in,” kala ong.
Ka kyrwoh kala pyntip ruh ba ka Meghalayan Age Limited (MAL) ka dei ka kompani jong ka Sorkar Jylla hapoh ka shatei jong ka Tnad Planning, kaba la pynrung kat kum ka kyndon 2(45) jong ka Companies Act, 2013.
Ka mang tyngka jong ka Meghalaya Ecotourism Infrastructure Development Projecr (MEIDP) ka long T. 731 klur bad ka dei kawei napdeng kiba bun ki project ba ioh pisa na shabar ( externally aided projects (EAP), kiba pyntreikam hapoh ka Jylla.
Lah ban kdew ba hapoh ka EAP bala pyntreikam hapoh ki Jylla ka thain Shatei Lam Mihngi, ka Sorkar India kala pyllait ia 90% ka song pisa kum ka grant sha ki Sorkar Jylla. Namar kata, tang 10% na kane ka pisa la hap ban siew da ka Sorkar Jylla.
Nalor kane, ka rukom pyniaid ia ka tender jong ka MEIDP ka dei kaba la leh kat kum ki kyndon jong ka Sorkar Jylla bad la khmih bad mynjur ia ka da ka Funding Agency, ka New Development Bank (NDB). Baroh ki jingtip halor kane lah ban ioh n aka https://meghalayatenders.gov.in.
“Haba khmih ia kane baroh, ka paw ba baroh ki jingkam ba pynmih da une u Nongai ia ka kyrwoh (Gokhale) ka dei kaba don jingthmu eiei sha lyndet” ong ka Sorkar ha ka kyrwoh.
Halor ka jingkynnoh ba ki kyrteng jong ki Contractor ym shym la pynpaw paidbah, u Commissioner & Secretary ula ong ba ia ki tender la pynmih da ki Tnad ba dei khmih-Public Works Department, Directorate of Tourism bad ka Sports Council ka Jylla. Ia ka rukom pyniaid ia ki tender la leh kat kum ki kyndon ka Sorkar Jylla bad la khmih bad mynjur da ka NDB. Baroh ki jingtip lah ban ioh a ki paidbah naka – https://meghalayatenders.gov.in/
Halor ka jingkam u Gokhale ba bun ki project hapoh ka Ecotourism Project ki dei ki surok, une u Ophisar Sorkar ula ong ba ki surok ki kynthup tang 14% n aka dor jong ka project. Nalor kane, kine ki surok la pyntrei hi da ka tnad PWD.
Halor ka jingkynnoh ba kam don satia kawei rurh ka Financial Report bala file sha ki Ministry ba dei khmih, une u Ophisar ula ong “Baroh ki jingdonkam bad ki kam ain lah bud ryntih da ka Meghalayan Age Limited. Ka long kaba donkam ia ki Agency ba mang pisa (NDB) ba kan thung ia ka Project Management Unit (PMU) ba kan khmih ia ka jingiaid bad jingpyntreikam ia kine ki project. Ia kane ka rukom pyntreikam ia baroh ki EAP la leh ym tang ka Meghalaya hynrei ha kiwei ki Jylla bad ki project ka Sorkar Pdeng ruh”.
Haba pynpaw ba kam dei kaba shisha bala pynmih sopsop ia ki tender ha kine ki laibnai, une u Ophisar Sorkar ula ong “Haduh mynta, lah dep ban pynmih tender haduh 8 tylli ki kam ha kane ka project. Na kine, 2 tylli la pynmih ha u Nohprah 2021, 4 tylli ha u Lber 2022 bad ia ki 2 tylli lah pynmih ha u bnai Nailar 2022 bad Risaw 2022”
