Shillong, Nohprah 5: Ka Synjuk Ki Rangbah Shnong Border Areas (SRSBA) hynne ka sngi Nyngkong kila aiti ia ka dorkhas sha u Myntri Rangbah ka Jylla bad Chief Executive Member (CEM) ka KHADC ba dawa ban buh ia ka Border Outpost ki Pulit ha Umlaper lane Ummat bad ha Umtlih ha ka jaka jong ka shnong Tyrso bad Thadrang.
Ka Synjuk kaba kynthup ia ki Khlieh Nongsynshar ka Raid Nongtung kila dawa ba ka Sorkar ka dei ban pynkhlain bha ia ki bor Pulit ha kine ki BOP ban ai jingiada ia ki paid Khasi lada don ka jingwan thombor na kano kano ka liang.
“Ka jingkhlain jong ki bor Pulit kam dei ban duna ia ka 50 ngut bad ai ruh ia ki tiar ialeh kiba khlain bad ki tiar ban tehlakam ha ki huri hura paidbah ha ryngkat ka hukum ba kin pyndonkam ia ki tiar ban iada ia ki paid Khasi” kila ong.
Ia kane ka Synjuk la synran da u MLA ka thain Bah Charles Marngar uba la ong ba baroh ki don ia kajuh ka jingsngew ba ki pyrshah jur ia ka rai jong ka Sorkar ban buh ia ka BOP ha shnong Tyrso bad Thadrang.
“U CEM ula ai ka jingkular ba un sa iakren ia kane ka kam bad ban pynbeit ia ka rai bala shim, kaba la pynrem jur da ki riew rangbah jong ka thain” ong u Bah Charles.
Ula buh jingkylli ruh ba lada ka Sorkar Assam ka pynieng ia ka Outpost ha ki jaka ba don jingiakajia, balei ba ka Sorkar Meghalaya kam leh lang kumjuh.
U Bah Charles ula ong ruh ba ka kyntien “Border” ka mut ba kine ki BOP ki dei ban don ha ki jaka khappud ym ha shnong Tyrso bad Thadrang.
