Aizawl, Nohprah 05 :Ha kawei ka jingjia kaba sngew bynniaw kaba la jia mynta ka sngi, ka ding kaba klang kala bamduh ia ki artylli ki iing Assam type ha Zion Veng ha Champhai district ka Mizoram.
Katkum ki tyllong khubor la ong ba kane ka jingpluh ding kala jia hapoh ka iing Assam type hajan Champhai Tourist Lodge ha ka por kumba 10:30 mynstep.
Kawei na kine ki iing ka dei kaba pyndonkam da ki artylli ki longiing, katba kawei pat ka dei kaba thylli.Ha kane ka jingjia ym shym la don kiba iap ne mynsaw kat haduh mynta.
Na ka liang ki kynhun pynlip ding ha ryngkat ki nongshong shnong ha kane ka jaka kila iashim bynta lang ha ka ban tem ia ka ding kaba klang.Ka jingthang petrol la suba jur ba ka dei ka dawbah kaba la wanrah ia kane ka jingjia, hynrei watla katta na ka liang ki bor pulit ki dang pynlong ka jingtohkit halor kane.
Kham hashwa, kata ha ka 30 tarik u Risaw mynta ka snem, sawngut ki briew kila duh ei la ka jingim bad 18 ngut kiwei pat kila ngat ha ki jingmynsw hadien ba kawei ka trok kit umphniang kala kem ding ha ki bynta jong ka Tuirial hajan Aizawl, Mizoram.
Kane ka jingjia kala jia hajan Tuirial airfield, kumba 18 km na ka thain mihngi ka Aizawl, kata hadien ba kane ka trok kaba kit kumba 22,000 litar ka umphniang petrol kaba dang thmu ban leit sha Champhai district ka jylla hadien ba kala kylla khongpong bad sdang kem ding ha ka por ba ki trai shnong ki dang pyrshang ban leit tong ia ka umphniang kaba tuid ha madan.
