Guwahati, Nohprah 05: U nongialam ka seng Congress u Rakibul Hussain mynta ka sngi ula kynthoh tyngeh ia u nongialam ka AIUDF u Badruddin Ajmal halor ka jingkren kynthoh ka jong u pyrshah ia ki Hindu bad ong ba u Ajmal u dei u briew u bym don ka jingiajan bad ba ka jingkren kynthoh ka jong u pyrshah ia ki Hindu ka long kaba shu kren khlem da pyrkhat sani bha.
Haba kren sha ki lad pathai khubor ha Sivasagar, une u nongialam ka Congress ula ong ba u Ajmal ula pynmih ia kiba kum kitei ki jingkren na ka bynta ban wanrah ka jingsngew iapher niam.
U Rakubul ula ong ruh ba ki don shibun kiei kiei kiba la pynshong nongrim halor ki jingshisha ba u Ajmail ula jied ia ka Karimganj kum ka jaka kiba un pynmih ia kiba kum kine ki jingkynthoh bad ai ruh ka jingkren tang lyngba ka lad pathai khubor jong ka ri bad ym sha kino kino ki news channel jong ka thain.
Nalor kata ula pynmih ruh ia kine ki jingkynthoh ha ka ktien Hindi bad kane ka paw shai halor ki jingthmu ba sha lyndet jong u.
“Ula pynmih ia kitei ki jingkren kynthoh na ka bynta ki jingioh nong sain hima bad ruh ban ioh ia ka jingphai khmat na ki lad pathai khubor jong ka ri,” ong u Rakibul Hussain.
Une u nongialam ka congress ula ong ruh ba u Ajmal ula bud ia ki sienjam jong u nongialam ka AIMIM u Asaduddin Owaisi uba ju paw bha halor ki jingkynthoh kiba pynmih ia ki kynrum kynram.
U Rakibul Hussain ula kynthoh ruh wat ia u Myntri Rangbah ka Assam u Himanta Biswa Sarma bad u don ka jingiatreilang bad u Badruddin Ajmal namar ha kiba bun ki khep u CM da lade hi ula phla ba u don ia ka jingiadei kaba jan abd u nongialam jong ka AIUDF bad ba ki ju pynlong ruh khah khah ia ka jingiakren hapdeng jong ki.
Shuh shuh u Rakubul Hussain ula ong ba kane ka jingkren bakla jong u Ajmal ka dei ka bym lah ban mab. “Ka jingpynshitom kaba biang tam na ka bynta u Badruddin Ajmal ka long ba um dei shuh ban pyni iala ka jong ka durkhmat sha ki paidbah bad sha ki lad pathai khubor,” ong shuh shuh u Rakibul Hussain.
Ha ka 2 tarik mynta u bnai u Ajmal ula kynthoh da kaba aijingmut ia ki Hindu ba ki dei ban iathoh shongkurim ha ka rta kaba dang khynnah bad ban kha shibun ki khun kumba long ki Muslim.
“Ki shynrang Muslim ki ju pyndep ia ka jingiathoh shongkurim ha ka rta 20,-22 snem, bad ki kynthei ruh ha ka rta 18 snem katkum ka ain ka sorkar. Ha kawei pat ka liang ki Hindu ki don kawei ar ne laingut ki lok buhrieh ba beain hashwa ba kon iathoh shongkurim, Kim shym la ioh khun, hynrei kila shu ialehkmen leh sngewbha ia lade bad tymgkai ia ka pisa, ” Ong u Ajmal.
Nalor kata ula Ong ruh ba ki shynrang Hindu Kim lah shuh ban ioh khun hadien ba kila pyndep ia ka jingiathoh shongkurim ha ka rta 40 snem, kata hadien ba kila pynlut ia ka ppr bad ka jingiadei ba buhrieh palat ia kawei ka kynthei.
Watla katta kham hadien na ka liang u Ajmal ula randien noh na katei ka jingkren bad pynmih ka jingpan man namar ka jingktah ia la jingsngew jong ki paidbah nongshong shnong ka Assam.
