Guwahati, Nohprah 05 :U briew uba la shah kynnoh donkti hakhmat eh halor ka jingjia kam thombor (ragging) kaba la jia hapoh Dibrugarh University, u Rahul Chetry ula wan pyndem noh ia lade hakhmat ki bor pulit ha Lekhapani hapoh Tinsukia mynta ka sngi Nyngkong.
U Chetry ula jah rngai noh naduh katei ka jingjia kam thombor hapoh katei ka university. U Chetry la kynnoh ba u dei uba donkti halor ka kam thombor ia ki khynnah pule kiba dang kham thymmai hapoh Dibrugarh University.U Chetry ula iai bteng ban phetkrad na ka jingshah kem ha ki bor pulit mynta lah hynriew sngi hadien ba katei ka jingjia kam thombor kala paw pyrthei, kata hadien ba uwei u khynnah pule u Anand Sharma ula ngat ha ka jingmynsaw kaba jur katba u dang pyrshang ban lait na ka jingshah thombor hapoh ka hostel jong ka university.
Lah ban kdew ba u Rahul Chetry ula phah da ka shithi shapoh police station hashwa ba un pyndem noh ia lade da kaba pynpaw ba um shym la ia don bynta ei ei ruh ha kaba iadei bad katei ka jingjia kam thombor.Ula ong ba ula don hapdeng ka jingphet rieh namar ula ngat ha ka jingshah byrthen pyniap bad kumta namar ka jingsyier u la phet krad noh napoh ka university.
“Sha ki nongshong shnong ka Assam, Nga sngew bynniaw ha kaba iadei bad katei ka jingjia kaba la jia hapoh Dibrugarh University ha ka 24 tarik u Naiwieng 2022, bad nga kyrmen na ka jingioh khiah noh jong u para jong nga u Anand Sharma.Ngam don kano kano ka bynta ba kane ka kam thombor.Ia ka kyrteng jong nga la kynthup lang ha kane ka jingjia.Nga sngewkyndit shibun.Kum u samla pule law, Nga burom ia ka ain jong ka ri bad ngan iai bteng ban leh kumta.Nga la shah pynbor ban phetrieh hadien katei ka jingjia.Nga sngew kumba ngan ngat ha ka jingshah thombor ha ki briew hadien ba ka kyrteng jong nga kala mih paw ha katei ka jingjia.Nga la shah pynkylla long u runar uba hakhmat eh halor katei ka jingjia bad ki don ruh katto katne kiba kynnoh ba nga dei u dkhot jong ka seng lehnoh ULFA-I.Nga dawa ia ka hok na ka bynta u Anand Sharma.Ai ba ka ain kan shim iala ka jong ka kam bad ban pynioh ia ka jingbishar hok na ka bynta une u lanot,” thoh u Rahul Chetry.
Lah ruh ban kdew ba sa uwei pat uba la shah kynnoh donkti ha katei ka kam thombor hapoh katei ka university ula wan pyndem noh hakhmat ki bor pulit ha ka step jong ka 4 tarik mynta u bnai.Ia une uba la shah kynnoh donkti la tip kyrteng kum u Kalyan Dutta.
Ha kane ka jinglong jingman ba dang shen kaba iadei bad katei ka jingjia ha Dibrugarh University, u Rahul Chetry uba la shah kynnoh donkti hakhmat eh ula shah beh noh napoh JB Law College, Guwahati.
U Rahul Chetry uba dei u samla pule barim ka Dibrugarh University ula bteng ia ka jingpule ha ka law napoh JB Law College ha Guwahati. U Rahul Chetry u dang pule ia ka LLB third-semester.
