Gangtok, Naiwieng 03 :U Myntri Rangbah (CM) barim ka Sikkim uba dei ruh u president jong ka Sikkim Democratic Front (SDF) u Pawan Chamling hynnin ka sngi Thohdieng ula kynnoh ia u Lat ka Sikkim ba um shym la trei na ka bynta ka bha ka miat jong ki paidbah nongshong shnong ka Sikkim.
Ula ong ba wat hadien ka jingjia shah pynjulor ba shyrkhei kaba la jia ha Pathing, hynrei u Lat ula ong ba na ka liang ka sorkar kala trei na ka bynta ka bha ka miat jong ki nongshong shnong ka jylla.U Chamling ula kynnoh ruh ia u Lat halor ka jingialam bakla ia ka sorkar pdeng.
U Chamling ula ong ruh ba ym kumba long ha kiwei pat ki jylla hynrei u Lat ka Sikkim u don ia ka bor kaba kyrpang hynrei um ju pyndonkam satia ia kata ka bor na ka bynta ban kyntiew ia ka ioh ka kot bad ka roi ka par hapdeng kiba bun bah ki kynhun nongshong shnong jong ka Sikkim.
Haba kren sha ki lad pathai khubor hadien ka jingleit jurip sha ka jaka ba la jia ka jingtwa khyndew ba shyrkhei ha Pathing, une u president ka SDF ula ong ba kane ka jingtwa khyndew kala ktah jur ia ka shnong Pathing baroh kawei bad kumjuh ia ki spah tylli ki longiing longsem.Nalor kata ula pynthikna ruh ia ki nongshong shnong ba na ka liang ka SDF kan trei na ka bynta ka bha ka miat jong kine ki briew kiba la shah ktah bad kan pynioh ruh ia ki lad jingiarap sha kine ki nongshong shnong wat lada na ka liang ka sorkar kala pulom ban leh ia kata.
Kum ban shu pynkynmaw ka jingtwa khyndew ba shyrkhei kala jia hapoh ka shnong Pathing kaba hap hapoh Yangang constituency jong ka Sikkim naduh ka 27 tarik u Naiwieng 2022.Hadien kane ka jingtwa khyndew, kawei ka iing kala shah pynjah rngai bad buh jingma ia palat 60 tylli kiwei pat ki iing.
