Agartala, Naiwieng 03 :U Chairman ka TIPRA Motha u Pradyot Kishore Manikya Debbarma hynnin ka sngi Thohdieng ula kynthoh tyngeh ia ka sorkar jylla namar ka jingbym aiti laitluid ia ki jingtreikam ha ki bor pulit kaba la nang pynjur ia ki kam iaumsnam hapoh Tripura.
Haba kren ha ka jingialang bad ki lad pathai khubor, une u hehduh ka TIPRA Motha ula ong ba ki kam iaumsnam kin dang iai bteng ha ka jylla lymda ki bor pulit kin ioh ban trei da ka jinglaitluid.
“Balei la tip ia ka Tripura kum ka jylla kaba jur ki kam iaumsnam hapoh ka thain shatei lamihngi (Northeast)? Lada ki pulit ki ioh ban trei laitluid, ki riew runar ruh shen kin ngat ha ka shrip.Kine ki kynhun runar kidei kiba la treikam bha ha ka por jong ka jingsynshar da ka seng Congress.Ka BJP mynta kala wan ha ka bor bad kumta ruh ki kynhun runar kim pat shym la jah rngai satia.Kine ki runar ki long ka jingsyier kaba khraw ia ka imlang ka sahlang,” ong u Pradyot.
“Ki don ki heh pulit kiba thrang ban iakhun pyrshah ia kine ki kynhun bymman. Hynrei kila shah pynjem khnap ha ki MLA bad ki Myntri sorkar.Ki kam iaumsnam kin dang iai bteng lymda ki bor pulit kin ioh ia ka jingtreikam kaba laitluid,” ula ong shuh shuh.Nalor kata ula ong ruh ba ki riew paidbah kila shah ktah jur namar ka jingdon jong kine ki kynhun pyntriem.
“Ki pulit ki sheptieng ban kem ia kine ki runar namar ki don ia ki nongkyrshan sain hima jong ki.U Myntri Rangbah (CM) ka jylla u dei ban aiti laitluid ha ka tnat pule ba kan pynsangeh ia kine ki kam pyntriem ha ka jylla,” ong u nongialam ka TIPRA Motha.
Ha kajuh ka por ula dawa ruh ban pynshitom tyngeh pyrshah ia kito ki runar kiba donkti halor ka jingshah pyniap jong uwei u briew ha ka por ba kala mih ka jingiakynad sain hima hapoh Charilam kaba hap hapoh Sepahijala district ka Tripura.
