Shillong, Naiwieng 30 : Ka sorkar Assam kala pynpaw ba kam don kano kano ka jingpyrshah iaka sorkar Meghalaya ba kan buh iaki Border Police Outpost ha ki thain Khappud lada ka jaka kadei hi kaba hap hapoh u pud u sam jong ka Meghalaya.
Ia katei la iathuh da u President ka BJP Meghalaya Bah Ernest Mawrie hadien ka jingiakynduh ia u Myntri Rangbah ka Assam u Himanta Biswa Sarma ha Assam Secretariat hynne ka sngi Balang.
“U Myntri Rangbah ka Assam ula kren da kaba shai ba um pyrshah eiei iaka sorkar Meghalaya ba kan buh iaki Police Outpost ha ki thain khappud na ka bynta ban ai jingshngain bad jingiada iaki paid nongshong shnong bad lada buh iaki Police Outpost ym dei pat ban buh ha u pud u sam uba hap ha ka jylla Assam” la ong u Bah Ernest Mawrie.
“Ngi la pynsngew ha u Myntri Rangbah ka Assam ba udei ban pynshitom iaki pulit bad ki Forest Guard kiba siat ia ki paradoh parasnam ki jong ngi bad na ka liang u Myntri Rangbah ka Assam ula iathuh ba ka Sorkar kala dep ban pynkynriah kam ia u SP bad la wengkam shipor ia u Officer In- charge bad shen ka CBI kan sdang noh iaka jingtohkit halor ka jingjia ha Mukroh, West Jaintia Hills” ong u Bah Mawrie.
U Nongialam ka BJP bad Myntri Sorkar Bah Sanbor Shullai u pyntip ba u Himanta ula pyntip ba shen un sa phah sorjamin ha ka tnad Survey ia ka shnong Mukroh bad lada shem ba katei ka jaka ka hap ha Meghalaya, hapoh shi kynta yn pynmih iaka hukum ban pynphai noh iaki jaka sha ka Meghalaya hynrei lada ka hap ha Assam kumta kin neh beit ha Assam.
“Ngi la dawa na u Himanta Biswa ba udei ban weng noh iaka Forest Guard Office kaba don ha Mukroh bad ula aika jingkular iaki nongialam ka BJP Meghalaya ba lada ia katei ka ophis la tei hapoh u pud u sam jong ka Meghalaya, hapoh shi kynta yn pynmih iaka hukum ban phah pynpra noh ia katei ka ophis” ula iathuh
Une u Myntri Sorkar ula pyntip ruh “U (Himanta) la hukum ruh iaki pulit Assam ba nangne shakhmat lada ki hap rung shapoh u pud ka Meghalaya ne ban pynlong iaka jingkhynra, kidei ban pyntip shwa sha ki pulit Meghalaya bad iaka jingkhynra ruh kidei ban ialeh lang khnang ba kan don ka jingiatreilang kaba iajan hapdeng ki pulit ka Assam bad ki pulit ka Meghalaya”.
U bah Ernest Mawrie ula iathuh ba u Himanta Biswa Sarma ula pynrem jur ia ki pulit bad iaki Forest Guard ka Assam kiba la siat iaki riewpaidbah bad ula ai ka jingpynthikna ba dei ban pynshitom da kaba tyngeh ia kitei kiba donkti ha ka kam siat.
“Ka jingiakren ka long kaba sngewtynnad bad kaba seisoh ha kaba u Myntri Rangbah ka Assam un sa hiar sha katei ka thain ha kaba yn don ryngkat ki nongialam shnong bad ki nongialam ka BJP Meghalaya ban leit ai jingiarap iaki longiing kiba mad iaka jingjia kaba sngewsih” ula pyntip.
Halor ka jingdawa ki paidbah ba dei ban tian bishar hapoh jylla Meghalaya ia ka jingjia ha Mukroh namar ka don hapoh u pud u sam ka Meghalaya, na ka liang u Bah Mawrie ula ong ha kaba iadei bad kane, kala don ka jingiakren hapdeng u Myntri Rangbah ka Assam bad Meghalaya bad namar kane la ieh beit ha ka jingstad jong kine ki ar sorkar ba kin shim ia ka rai halor kane ka bynta.
