Shillong, Naiwieng 28 : Ki saw ngut ki Dkhot ka Federatuon of Khasi Jaintia & Garo People (FKJGP) bad ka Khasi Students Union (KSU) ba shah kem halor ka jingkulmar na ka rally kyrduh kam ka FKJGP, kila lait hynne ka sngi nyngkong ha along ka Sardar Police Station.
Kine ki saw ngut kila ngat shong along ia palat 24 sngi. Arngut na ki, ki dei kiba shah kem na ka thain Mawlai bad Jaiaw ha ka 3 tarik Naiwieng katba arngut kiwei pat la kem na kijuh ki thain ha ka sngi kaba bud.
Lah ban kdew ba ka FKJGP da ka jingiawan iasnohkti lang bad kiwei ki Seng kum ka KSU, RBYF bad HNYF kila iaid paidbah na Motphran sha Madan Iewrynghep ( madan Firebrigade) ban iakhih halor ka jingkyrduh kam bad jingnang kharoi ki samla ba khlem kam khlem jam hapoh ka Jylla.
Kane ka rally ba jai jai kala poi man sha ka huri hura ha kaba ki nongiaid rally kila shoh ia ki katto katne ki briew ba iaid ba ieng bad pynjulor ia ki kali ha ki thain Police Bazaar, Malki bad Dhankheti.
