Shillong, Naiwieng 28 :Haduh lai ngut ki MLA ka Jylla kila iehnoh ia ka kam long Nongmihkhmat sha ka Iingdorbar Thaw Ain (MLA) hynne ka sngi nyngkong.
Kine ki lai ngut ki MLA ki kynthup ia arngut ki MLA ka National Peoples’ Party (NPP) bad uwei u MLA ka All India Trinamool Congress (AITC).
Ki MLA ka NPP ki dei u Benedic R Marak ba mihkhmat ia ka Raksamgre Constituency bad ka Ferlin A Sangma jong ka Selsella Constituency. U MLA ka AITC u dei u Bah Himalaya M Shangpliang uba mihkhmat ia ka Mawsynram Constituency.
Kine ki MLA kila leit ban aiti ia ka shithi iehnohkam hynne ka sngi nyngkong ha u Lamphang ka Iingdorbar Thaw Ain ka Jylla Bah Metbah Lyngdoh.
Ka khubor ba dang shu ioh ka iathuh ba uwei pat u MLA Samuel Sangma ula ai ia ka shithi iehnohkam kum u Associate Member ka UDP bad ia ka shithi iehnohkam la aiti ha u President ka UDP ha ka jingsynran lang da u Nongialam bad MLA ka BJP bad A.L.Hek.
Kat kum ki khubor ba ioh lum, kine ki saw ngut ki don jingthmu ban leit pyniasoh noh sha ka Bharatiya Janata Party (BJP) bad ban pynkhreh ban mih iakhun ia ka elekshon MLA-2023 na ka BJP.
U Bah Himalaya Shangpliang haba iakren bad ki nongthoh khubor ula pynthikna ba ki arngut ki MLA ka NPP bad ma u, kin sa leit ban iasoh noh sha ka BJP ha kine ki khyndiat sngi ban wan.
Kat kum ka jingong jong u, ka BJP ka dei ka party kaba ai ia ka roi ka par bad baroh laingut ki MLA ki kwah ba ka Jylla ruh ka ioh ia ka roi ka par.
