Guwahati, Naiwieng 28 :Da kaba kynthoh pyrshah ia u Myntri Rangbah (CM) ka Assam u Himanta Biswa Sarma, na ka liang u nongialam ba la rim ka seng Congress u Jairam Ramesh hynnin ka sngi U Blei ula ong ba ki jingkren kynthoh jong u Sarma ki thmu ban pynphai khmat shawei wat namar ka jingpulom ha ka rukom synshar ka jong u.
U Jairam ula ong ruh ba u CM ka Assam u ju kynthoh tyngeh ia ka party barim jong u lem kumjuh ia ki nongialam jong ka kiba la pynlong ia u kumba u long mynta.
“U CM ka Assam uba la ioh ia ka burom lyngba ki arngut ki nongialam ba hashwa jong u, kata u Hiteshwar Saikia bad u Tarun Gogoi ula pynmih ia ki jingkynthoh kiba ha rukom pyrshah iala ka jong ka party barim kumjuh ia ki nongialam jong ka.Hynrei aiu ula leh halor ka jingjia shah pyniap jong ki hynriew ngut ki briew na ka jingshah ther kuli ha ki bynta khappud ka Assam bad Meghalaya kaba la pynkihwin ia ka jylla Meghalaya,” ong u Jairam Ramesh lyngba ka twitter.
“Ki jingkren kynthoh ki jong u ki thmu tang ban pynklet noh ia ka rukom synshar ba pulom ka jong u,” ong shuh shuh u Jairam lyngba ka twitter.
Na ka liang une u nongialam ka Congress ula kynthoh jur ruh ia u Sarma namar ka jingbym kren ei ei ha kaba iadei bad katei ka jingshah siat iap jong kitei ki hynriew ngut ki briew kaba la jia ha ki bynta khappud ka Assam bad ka Meghalaya.
Kham hashwa, u Jairam ula kynthoh ruh ia u Sarma halor ka jingkynthoh ia ka party barim bad ong, “Katto katne kum u CM ka Assam bad u Bhubaneswar Kalita ki nang tharai ba ka jingim kan kham bha da kyndat sharud ia ka party kaba la pynlong ia ki kumba ki long mynta.”
Lah ban kdew ba u Sarma uba la mih noh na ka Congress bad leit pyniasoh sha ka BJP ha u 2015, ula ju kynthoh khah khah iala ka jong ka party barim kumjuh ia ki nongialam ki jong ka.
Dang shen ha ka rally ialap ilekshon ha Gujarat, u Sarma ula kynthoh pyrshah ia u nongialam ka Congress u Rahul Gandhi da kaba ong, “Ryngkat bad u tmain u Rahul Gandhi ula kham iasyriem ia u Saddam Hussein”.
“Nga la iohi ba ka durkhmat jong u ruh kala kylla.Hynrei lada phi dei ban pynkylla, la kumno kumno ban iasyriem ia u Sardar Vallabhbhai Patel lane wat ia u Jawaharlal Nehru kan kham biang. Kan kham bha ruh lada un iasyriem ia u Gandhiji. Hynrei palei ba ka durkhmat jong phi kan kylla sha u Saddam Hussein?” Ong u Sarma.
Kane kam dei ruh ka sien kaba nyngkong ha kaba ka BJP kala kynthoh pyrshah ia u Rahul Gandhi.Ha kawei na ki khep, hadien ba la plie ia ka jingiaid paidbah lane ka ”Bharat Jodo Yatra” u CM ka Assam ula kynthoh ia u Rahul da kaba ong; “U (Rahul) u dei ban leit sha Pakistan na ka bynta kane ka jingiaid paidbah lada u kwah ia ka jingpyniatylli.”
