Shillong, Naiwieng 22 : Hynriew ngut ki nongshongshnong ka thain Mukroh kila kyllon iap bad bun ngut kila mynsaw na ka jingther kuli jong ki Pulit Assam hynne ka step sngi ba-ar ha ka shnong Mukroh kaba don ha khappud Block-I, West Jaintia Hills.
Kane ka jingjia kala jia ha ka por 7 baje mynstep hadien ba ki paidbah nongshong shnong ka thain kila iamih paidbah halor ka jingshah kem ki katto katne ngut ki para nongshongshnong ha ki Pulit ka Assam kiba dang leit sha bri.
U Rangbah Shnong ka Mukroh Bah Hamboi Sumer ula pyntip ba ki Pulit Assam kila wan rung hynne ka step sha shnong Mukroh ba don kawei ka kali kit dieng hynrei ha kane ka jingwan jong ki, kila kem pynban ia ki nongleit bri leit lyngkha.
Kat kum ka jingong jong u, ki paidbah haba iohi ia kane ka kam ki Pulit, kila bat ia kane ka kali ki Pulit Assam bad dawa ban pyllait ia kine ki para nongshongshnong bad kala mih ka jingiania kaba jur bad dei ha kane ka por, ba ki Pulit ka Assam kila synreit kuli sha ki paidbah.
Une u Nongialam Shnong u pyntip ba ha kane ka jingther kuli, kila don ki briew kiba iap kumba 4 ngut eiei bad don ruh kiba la mynsaw jur.
Kat kum ka jingtip na ki Nongialam Shnong la iathuh ba ki briew kiba iap ki dei kiba la tip kyrteng u Bah Si Dhar bana Samaro, u Bah Thad Shadap na Mukroh, u Bah Six Talang na Barato bad u Tang Nartiang na Mukroh bad arngut ki bym pat ioh kyrteng.
Na ki khubor ba ioh lum la iathuh ba uwei napdeng kiba iap u dei u Forest Guard jong ka Assam.
Kiba mynsaw jur pat ki dei u Elias Samarang na Mukroh, u Sheini Nartaing na Mukroh bad u Chirup Sumer na Mukroh nalor kiwei ki bym pat ioh kyrteng.
U Bah Chandame Sungoh uba dei u Chairman ka Hynniewtrep Border Dispute Redressal Forum ula pyntip ba ki Pulit ka Assam kila wan kthong ia kawei ka kali kit mar ka bym lah satia ban tip ka dei kaba kit aiu bad kila kem ia ki briew kiba dei na ka shnong Mukroh.
U pyntip ba ki paidbah kila iamih ban pyrshah ia kane ka jingkem ia ki nongshongshnong bad sa poi kane ka jingther kuli.
Ki Nongialam Shnong ki iathuh ba kane ka jingther kuli kala pynphet sakma ia ki paidbah bad bad bun kila phet rieh mynta sha khlaw.
