Shillong, Jylliew 22: Ka Iingkashari Meghalaya High Court hynnin ka sngi ba-ar, kala hukum ia ka Sorkar Jylla ba kan aiti ia ka kaiphod halor ka sienjam ba kala shim ban pyntreikam ia ka Rule ba don ha Jylla haba iadei bad ka jingbuh da u pud ia ka jingkhia jong ki kali kit mar ba iaid hapoh ka Jylla.
“Ka Jylla ka dei ban aiti ia ka report haba shong bishar biang ia kane ka mukotduma hadien lai bnai, kaba kdew ia ki sienjam bala shim ban pyntreikam janai ia ka rule bala duh ha Jylla kaba iadei bad ka jingbuh pud ia ka jingkhia jong ki kai kit mar ba iaid ha Jylla” ong ka kashari ki arngut ki Nongbishar haba shong bishar ia ka PIL bala mudui da u nongtrei mon sngewbha Tennydard M Marak.
U Tennydard ula pynpaw ia ka jingsngewkhia halor ka rukom pyntreikam ia kane ka Rule haba ong “Ki don ki rule ban pynthikna ba ki kali kit mar ki dei ban kit da u pud ka jingkhia hynrei kam shym la don satia ka jingpyntreikam ia kine ki rule”.
Haba peit ia ka jinglong ki jaka ha kane ka Jylla bad ka jingmad ia ka jingjur slap, ka long kaba dei eh ba ki kali kit mar ki dei ban bud ia ki kyndon bala buh ba kim bit bankit mar palat ia ka jingkhia bala buh.
Nalor kane, ka Jylla kan hap shong bishar biang ia ki kyndon bad iadei bad ka jingkit khia ki kali khnang ban pynthikna ba ki surok kin nym jot arshah nalor ka jingjur u slap sa ka jingkit palat pud jong ki kali kit mar ha ki Highway.
Hynrei ka Sorkar Jyla kala pyntip ba kam pat don satia ia ki kor treikam ban thew ia ka jingkhia jong ki kali kit mar.
Namar kane, ka Iingkashari kala bthah ia ka Sorkar Jylla ba kan pyndonkam ia ki weighbridge bad lah ruh ban pynieng shuh shuh ia ki weighbridge ha ki jaka ba donkam ban ioh thew ia ka jingkhia jong ki kali kit mar. Ka ong ba ia kine ki weighbridge lah ban pynieng marjan bad ki Entry Point sha ka Jylla bad ruh ha ki katto katne ki jaka ba don ha shiteng lynti.
Ka Iingkashari kala bthah ruh ba ka sorkar ka dei ban buh kham bun ki briew ba thew ia ki kali kit mar khnang ba kine ki kali kit mar ba pyndonkam ia ka surok ka Jylla kin hap ban bud ia ki kyndon bala pyrkhing kat kum ka aiñ.
Ka Iingkashari kala buh ban shong bishar biang ia kane ka mukotduma ha ka 21 tarik u Nailur.
