Shillong, Naiwieng 19: U Nongialam ka NPP-Meghalaya Dr WR Kharlukhi hynne ka sngi saitjain ula thalain ia u Nongialam ka Liang Pyrshah All India Trinamool Congress (AITC) Dr Mukul Sangma halor ka jingkam ba ka survey ka NPP ka la pynpaw ba kan ym jop palat ia ka 5-6 seat na Ri-lum Garo ha ka elekshon ban wan.
“Lada u (Dr Mukul) ong ba ka survey ka dei kaba leh da ka NPP, ka mut ba um dei satia u TMC hynrei u dei u NPP lem kumta kumno un tip ia ka survey” ong une u MP ba marwei ka Jylla sha Rajya Sabha.
U Dr Kharlukhi ula ong ba ha u snem 2018, kila jop 20 seat kum ka Congress hynrei kila phet noh sha ka AITC. “Namr kata, kin dang don hapdeng ka jingbishar da ki paidbah ka Ri-lum Garo bad nga duwai bad kyrmen ba un nang ha kaban khein jingkhein ialade shuwa lem kumta u lah ban shah rem wat na ka Constituency ba u mihkhmat” maham u Dr Kharlukhi.
Ha kawei ka liang, une u Nongialam ka NPP ula ong “Mano ban tip ba lada ki lah ban phet na ka congress kumto, lada don mano mano ba wan ha ka bor, ki lah ruh ban phet na ka AITC…ngam don eiei ban ong ia kata”.
Haba kylli, une u Nongialam ka NPP ula ong ba dei ka Congress kaba sdang ia ka Basin Development hynrei “Ka surok na Tura sha Shillong ka dei kaba la sdang da u PA Sangma bad haba u Dr Mukul ula wan ha ka bor, ula kam ei. Nga la iakren bad u CM ba ngin sa pynmih da ki jingthoh ia kiei ki kam ba ngi la leh ha ka jingsynshar jong ngi”.
Ha kajuh ka por, u Dr Kharlukhi ula kyntait ba ka don ka jingiapynbeit sop sop bad ki MLA na kiwei pat ki party ban nym pynieng kyrtong na Mairang bad South Shillong Constituency.
“Ngi dang hap peit ia kane bad ia mynta hi ngin ym pynieng kyrtong (Mairang bad South Shillong) hynrei ngi dang don por sa arbnai. Ngim don satia ia ka jingiapynbeit sop sop, ngi treikam haba shai beit” ula ong.
Ka Mairang ka dei kaba mihkhmat mynta da u President ka UDP bad Lamphang ka Iingdorbar Bah Metbah Lyngdoh bad ka South Shillong ka dei kaba mihkhmat da u Nongialam ka BJP bad Myntri Sorkar Bah Sanbor Shullai.
