Shillong, Naiwieng 19 : Hadien ka BJP, sa u President ka National People’s Party (NPP)-Meghalaya Dr WR Kharlukhi hynne ka sngi saitjain, ula kam ba haduh 8 ngut ki MLA jong ki seng sain pyrthei bapher bapher, kin sa wan ban pyniasoh noh sha ka NPP ha u bnai Kyllalyngkot 2023 shuwa ka elekshon.
Kat kum ka jingong jong u, kine ki MLA ki dei na ki seng sain pyrthei bapher bapher ba kila dep pynkhreh nadong hadong ban pyniasoh noh sha ka NPP shuwa ka elekshon MLA 2023 ha Jylla.
Haba kylli halor ka jingsuba ba 3 ngut ki MLA kin sa mih noh na ka NPP, u Dr Kharlukhi ula ong “Kane ka dei ka por ba ki MLA kin kylla liang (kynthih diengkper). Nga tip balei ba ki kylla liang ruh namar lada ki iai neh sah bad ngi, kin ym ioh ticket satia. Kane ka dei ka jinglong jingman”.
Ka khubor ka iathuh ba u MLA ka Phulbari SG Estamur Mominin bad MLA ka Selsella ka Ferlin CA Sangma ki lah ban leit iasoh noh sha ka BJP bad u MLA ka Ramsakgre Benedic Marak u lah ban iasoh sha ka AITC.
Halor ka jingkynnoh ka BJP ba ka jingkem ia u Vice President bad MDC ka Tura Bernard N Marak kala paw shai ba ka dei ka kput sain pyrthei jong ka NPP namar ka jingsheptieng ia ka elekshon, u Dr Kharlukhi ula ong “Lada ngi sngew sheptieng, ngin ym iakhun satia ia ka elekshon”.
“Ngam don eiei ban ong ia kata..Phi la iohi ia ki video bad lad aka Rimpu Bagan (farmhouse) ka dei ia kane te, nga te ngam tip. Ynda ula long MLA/Myntri, baroh kawei ka Nongbah Shillong kan sa kylla long kumjuh…ngam kwah ban ong eiei satia” ula bynrap.
U President ka BJP Bah Ernest Mawrie ha ka sngi Balang ula kop ia u Myntri Rangbah Conrad K Sangma ban iakhun ia ka elekshon MLA tang na South Tura ym ban mih iakhun na artylli ki Constituency bad ban mad ia ka bor jong u Vice President Bernard N Marak ha ka elekshon MLA 2023.
Haba kynthoh ia kane, u Dr Kharlukhi ula ong ba ka BJP ka dei tang ka khla khlem bniat ka ban ym nud satia ban leh eiei.
“Ngam shimkhia satia ia ki…Katno sien nga la ong ba ki dei tang ki khla khlem bniat bad bym leh eiei” ula ong.
