Shillong, Naiwieng 18: Kum shi bynta ban khring ia kiwei ki samla pule na kiwei ki ri ka dewbah Asia, ka North Eastern Hills University (NEHU) haka jingiatreilang bad ka Ministry of External Affairs (MEA) ka sorkar pdeng kan pynlong daka tamasa ‘ASEAN Musical Festival’ haka 22 tarik mynta u bnai ha NEHU campus Shillong.
Haba kren sha ki lad pathai khubor u Prof D. K Nayak u la ong ba la pynlong ia kane ka tamsa iatem ia put naka bynta ban pynkhlain shuh shuh ka jingiadei hapdeng ki samla pule ka jylla Meghalaya, ka thain Lam Mihngi (North East) bad kiwei ki samla ba na bar ka ri India khamtam naka thain Asia.
U Prof. Nayak u la ong ba ka long ka jingsngew sarong ba ka tnat Ministry of Home Affairs (MHA) ka jied iaka skulbah NEHI Shillong ban pynlong ia kane ka tamasa ASEAN Musical Festival ka ban dei ruh kum shi bynta ban iakynduh lang ki nongmihkhmat ka Association of Southeast Asian Nations (ASEAN) ban iathir kumno ban nang pynjanai shuh shuh ka jingiadei hgapdeng ka ri India khamtam ka thain Lam Mihngi bad ki ri ba don haka thup ASEAN.
“Kum kine ki jait prokram kin iarap ban khring ia kiwei ki samla ki ri ba hap haka thup ASEAN ban wan pule hapoh kane ka skulbah NEHU ban don ruh ka jingiasam markylliang halor ki lad jingtip tynrai jong ki ri lajong” la ong u Prof. Nayak.
U Prof. Nayak u la iathuh ba ha kane ka tamasa ‘ASEAN Musical Festival’ kin don lai tylli ki kynhun tem kiba napoh ka ri Indonesia, Singapore bad Myanmar ki ban wan tem lang bad ka kynhun tem napoh ka jylla kata ka Colour.
U la iathuh ha kane ka sngi kan don ruh ka jingiatai halor kumno ban kyntiew iaka jingiadei hapdeng hapdeng ka ri India khamtam ka thain Lam Mihngi bad kiwei ki ri ba don haka thup ASEAN bad kumno ban isam markyllieng iaka jingnang jingstad tynrai bad kumno ban kyntiew iaka pule puthi.
Shuh shuh u la iathuh ba ha kane ka sngi kin don ruh ki myntri sorkar pdeng bad sorkar jylla bad ki riew shemphang ki ban ai jingkren halor ka jingmyntoi ban iasyllok bad ki ri bapher bapher khamtam kiba don hapoh ka thup ASEAN.
