Shillong, Naiwieng 18: Ki phra tylli ki jylla ka thaiñ shatei lammihngi kidei kiba la kyrkhu da ka jingitynnad ka mariang, ka jingdon ki mrad, ki jingthung kiba bun jait, ki jaka kiba kyrpang ha ka histori, kiba don ka deiriti bad ki dustur kiba kyrpang bad kiba don ruh ia ki briew kiba pdiang kylluid mynsiem ia kiwei. Kine ki dei ki mat ba la pynpaw ha ka sngi ka baar jong ka International Tourism Mart 2022 kaba la long ha Aizawl, Mizoram.
Ka thong jong ka ITM 2022 ka dei ban pyni ia ki lad kiba don ha ki kam jngohkai ha ka thain shatei lammihngi na ka bynta ki nongshong shnong ka ri bad kito kiba nabar ri.
Kiba bun kiba iashimbynta ha katei ka jingialang kila pynpaw ba ka thain ka don ki lad na ka bynta ki kam jngohkai kiba iadei bad ki mrad, ki kam thung slasha bad ka jinglehkai Golf, ka kam jngohkai ha ki wah, ki kam jngohkai kiba iadei bad ka niam, ka deiriti bad ki marbam ba pher, ki kam jngohkai ban pynbyrngia, ki kam jngohkai kiba iadei bad ki kam rep ha ki jaka nongkyndong bad ruh ki jaka ba bun ki bapher bapher.
Kila ong ruh, ba ka thain shatei lammihngi ka don ia ki jaka kyrpang ia ki mrad kum ka Kaziranga National Park kaba pawnam namar ka jingdon ki kyndat. Ka wah Brahmaputra ka tuid lyngba ka Assam ha kaba ki nongjngohkai ki lah ban leit shong lieng bad ki wah ka Arunachal Pradesh kiba tuid sha ka Brahmaputra ki plie lad ia ki kam white water rafting.
Ka thain ka don shibun ki jingkhring ia ki nongjngohkai bad man ki jylla ki don la kajong ka jinglong kyrpang bad ki lah ruh ban don ka roi ka par ha ki kam jngohkai.
Ha kane ka ITM ka la don ruh ka jingialang ha kaba ki nongthied na ki thaiñ bapher bapher jong ka ri kila iakynduh markhmat bad ki nongdie na ka thaiñ shatei lammihngi bad kala don ruh ka jingpyni ia ki mar shna kti bad ki jaiñ ban pyni ia ki mar kiba iadei bad ka kam jngohkai jong ki jylla ba la iashim bynta ha kane ka prokram.
U Secretary ka tnat Tourism, u Arvind Singh ula ong, kala don ka jingdawa ban don ki kam jngohkai bym ktah ia ka mariang ka dang kiew namar ki briew mynta kila kham peit bha ia ka jingktah ia ka mariang bad ki dang wad ia ki lad kiba lah ban iaineh bad ka Sorkar India mynta ka ïengskhem ban kyntiew ia ki kam jngohkai ki bym ktah ia ka mariang namar kine ki jait kam jngohkai ki don lad ban kyntiew ia ka ioh ka kot bad ki pynduna ruh ia ka jingktah ia ka mariang bad ka imlang sahlang.
Ka Principal Secretary, ka tnat Tourism jong ka Sorkar Mizoram, ka Manisha Saxena kala ong, ka Mizoram ka la pawnam naduh mynshuwa namar ki lad kiba don ha ki kam jngohkai manar ka jingitynnad ka jaka, ki lum kiba jyrngam bad ki lum ki them kiba bun bad 90% ka jaka jong ka Mizoram ka dei kaba tap da ki khlaw bad ka suinbneng ka long ka bym shit ne khriat palat bad kane ka khring bha ia ki nongjngohkai.
Ka Mizoram ka dei ka Jylla kaba kmen tam jong ka India katkum ka kaiphod India Happiness Report, 2020 bad ka jingdon ki briew ba nang ban thoh ban tar ka long 91.33 bad ka long kaba lai ha ka ri.
Ka tnat Tourism jong ka Sorkar India ka dang pynlong ia ka bynta kaba 10 jong ka International Tourism Mart (ITM) na ka bynta ka thaiñ shatei lammihngi naduh ka 17 haduh 19 tarik u Naiwieng 2022 ha Aizawl, Mizoram.
Ki International Tourism Mart kidei kiba pynlong ha ki jylla ka thaiñ shatei lammihngi bad la ju pynlong teng ha Guwahati, Tawang, Shillong, Gangtok, Agartala, Imphal bad Kohima.
