Shillong, Naiwieng 17 : Ka Iingkashari Meghalaya High Court hynne ka sngi palei, kala bthah ia ka Sorkar Jylla ba kan shim ia ki kynja warranty khnang ba ki Contractor kin hap ban maramot ia ki surok ba ki shna lada ki sniew noh tang katto katne por.
“Ka Jylla kan kham biang lada ka pan ia ki kynja warranty khnang ba ki contractor kin hap ban maramot ia ki surok ba ki shna lada ki jot noh tang hadien katto katne por ba ki dep pyntrei” ong ka Division Bench haba bishar ia ka PIL jong u AH Hazarika ba iadei bad ka jingshna ia ka surok Agia-Mendhipara-Phulbari-Tura (AMPT).
Ka Iingkashari kala bthah ruh ia u Supervising Engineer ka PWD (Roads) ban leit khmih ia ka jingtrei ha kane ka surok ban pynthikna ba ki Contractor kin pyntrei ia ka kam kat kum ki kyndon bala buh bad ban pynthikna ruh ba ka surok kan ym jot noh tang hadien katto katne por.
Kat kum ka kaiphod bala aiti da ka Sorkar, la paw ba ka kam kala iaid bha, ha kaba la lah ban pyndep ruh ia ka surok ba 33 km bad ba ka jingpyntrei ia kaba dang sah, kala iaid shaid shaid.
U Nongmudui ula ujor ia ka bynta jong ka 41 km namar ia kane ka kam la ai ban pyntrei ha ki hynriew ngut ki Contractor kiba la shu pyntrei thohmut thohmat ia ka kam.
Une u Nongmudui ula antad ruh ba hadien shibnai eiei hadien bala pyndep ia ka jingtrei, kane ka surok ka lah ban ngam bad ka surok rong ruh ka lah ban jah noh.
Haba jubab ia kane, ka Sorkar kala ong ba ia kane la lem khnang na ka bynta ban pynsted ia ka kam khamtam ba ki Contractor na katei ka thain, ki lah ban nym don ia ka pisa ban pyntrei ia ka kam kaba bun lane ban pyndep ia kane ka kam hapoh ka por kaba lyngkot.
Ka Iingkashari kala buh ban shong bishar biang ia kane ka mukotduma ha ka 20 tarik Rymphang, 2023.
