Shillong, Naiwieng 17: Ha ka sngi balai jong ka Chief Minister’s Start-Up and Corporate Social Responsibility (CSR) Week la pynlong iaka Panel Discussion ne ka jingiatai da kaba iatreilang bad ka Investment India on CSR & Entrepreneurship Scenario in Meghalaya, ha kaba ki nongseng kam lajong kila pynpaw iaka jingshem ka jongki ha kaba iadei bad ki projek kiba la pyntreikam lyngba ka CSR.
Ka Head jong ka North East Desk, Invest India, ka Geetima Das Krishna, kala ai ka jingbatai ha kaba iadei bad ki kyndon jong ka CSR bad ka jingsdang jong ka North East Desk lyngba ka Invest India.
Kala ong, ka Invest India kadei ka kynhun kaba treikam ha baroh kawei ka ri ha kaban wanrah iaka jingbei tyngka bad ban aikam aijam da kaba pyndonkam ia kiba bun ki lad ki lynti na ki sorkar jylla bad iaka North East Desk la sdang pyntreikam naduh u Lber 2021.
U Vijay Kumar Damera, Commissioner & Secretary ka tnad Planning, ka sorkar jylla ula kren halor ka jingdonkam ban wanrah iaki Scale Up Loans na kiwei pat ki nongiatreilang ban pynneh bad pynkhlain iaki nongsengkam lajong haka jylla.
Ula ong, ba donkam shuh shuh ban ioh iaka jingbei tyngka kaba kham heh ban pynkhlain bad ban pyniaid shakhmat iaki nongseng kam lajong watla kila sdang iaki kam ki jam jongki lyngba ka jingiarap tyngka jong ka sorkar jylla.
“Watla ka PRIME kala long kaba seisoh bad ki Startup Policy kila pynlong iaka Meghalaya kum ka Jylla ba biang tam ha ki Startup hynrei haki 10 snem ban wan ka jylla ka dang donkam ban kiew shaphrang? Haei ngi donkam ban bei tyngka? Kawei na ki paia kiba hakmat kadei ka jingsengkam lajong bad ka long kaba kongsan ban ioh iaka jingbei tyngka na ki karkhana shimet bad ki Bank. Ki jingialang kiba kum kane ki dei kiba ngi lah ban thaw ia ki lad ki lynti bad ban khot ne pan ia ka jingiatreilang na ki kynhun ban kyntiew ia ki nongsengkam lajong” ong u Vijay Kumar.
Hadien kane, la pynlong iaka jingiatai halor ka phang “Entrepreneurship Scenario and Challenges Faced by Entrepreneurs in Meghalaya Introduction of Promising Entrepreneurship related sectors for CSR in Meghalaya” ia kaba la pyniaid da u Flo Oberhofer, Program Head jongka PRIME Meghalaya.
Ki nongiashimbynta ha katei ka jingiatai ki kynthup ia u Bah Augustus Suting, Deputy Director, M-LAMP & General Manager, MBMA, u Dr. Benjamin F. Lyngdoh, Associate Professor, Dept. of Tourism and Hotel Management, Dasumarlin Majaw, nongseng jongka Smokey Falls Tribe Coffee, u Gopal Purkayastha uba long u Deputy Vice President ka HDFC Bank.
U Bah Suting ula kren halor ka rukom treikam treijam ha ka jylla bad pynpaw ba ki kmie ki kpa ki pynbor iala ki khun ban wad ia ki kam sorkar.
Ula ong, mynshwa ki briew kidei ki nongkhaii bad ki nongseng kam lajong hynrei naduh ba wan ki phareng, bun kila kylla bad bun kila kylla long tang kum ki nongtrei ha ki karkhana. Watla bun kila dei kiba la nang la stad hynrei kim don pat ia ki sap ki phong bad ka thong ka jongki kala shu kut da kaba trei ha ki kam sorkar hynrei namar ka jingkylla ka por, ka long kaba kongsan ha kane ka por kaba mynta ban pynmih iaki lad kamai bad ban sdang ban seng kam lajong.
U Bah Lyngdoh, ula ong ka jinglong jingman kala kylla katkum ka jingiaid ka por bad ki samla kila shimkhia bad phaikhmat bha ha kane ka bynta bad ki khynnah ha NEHU kila shim ba ka jingseng kam lajong kadei ka lad kaba biang tam ban tei iaka lawei ka jongki.
Ula ong, ha ki snem kiba mynshwa ka don ka kolshor ban wan shakhmat ha ki jingpule hynrei namar ka jingkyrduh kam kyrduh jam kumta kala don ka jingdawa ha kiwei pat ki jait kam bad lyngba ka jingiarap ka kor internet kala ktik iaki jingmut jingpyrkhat jong kiba bun ki samla.
U Bah Majaw ula ong ka jingkyntiew ia ki kam jngohkai ha ki thaiñ nongkyndong bad ka jingsaindur iaki jingbam kila sdang ban treikam bha bad kila aikam aijam ia kiba bun ki briew haki nongkyndong.
Ki riewshemphang kila pynkut iaka jingiatai da kaba pynpaw ba donkam ban thaw ia ki lad ki lynti kiba paka ban pynneh pynsah bad ban pynkhlain iaka rukom treikam jongki nongseng kam lajong.
Hadien kane la pynbud sa ia kawei pat ka jingiatai ha kaba iadei bad ka rukom khaïi pateng ia kaba la wan ban iashimbynta da ki nongsengkam lajong .
