Guwahati, Naiwieng 17 :Ki bor pulit ka Chirang kila kem noh ia u runar uba donkti ha kaba siat iap ia kawei ka longkmie 60 snem rta ha ki bynta jong ka Panbari kaba hapoh Chirang district ka Assam.
Katkum ki tyllong khubor la ong ba katei ka jingjia kala jia ha ka 11 tarik mynta u bnai hadien ba katei ka longkmie la kynnoh ba kala shah siat iap ha ki runar bym lah ban ithuh ha Panbari.
Katkum ki pulit, kine runar kila siat tang shi kuli da kaba thew pyrshah ia katei ka longkmie kaba la khlad noh hashen.
Halor kane ka jingjia la rejistar ia ka case hapoh Panbari police station bad na ka liang ki pulit kila sdang ban pynlong ia ka jingtohkit.
Ki bor pulit kiba la pynlong ia ka jingtohkit halor kane ka jingjia mynta kila ioh ban kem noh ia u briew uba donkti ha katei ka kam pyniap bad ioh ruh ban kurup noh ia ka suloi ba la pyndonkam ha katei ka kam pyntriem.
“Ha ka 11 tarik mynta u bnai, kawei ka longkmie 60 snem rta kala shah siat iap ha ki briew ki bym lah ban ithuh hapoh ka shnong Panbari.Ki pulit kila wan poi mardor ha kane ka jaka hadien kane ka jingjia.Hadien ba ngi la pynlong ka jingtohkit hapoh ka 72 kynta ngi la lah ban kem noh ia u runar uba donkti ha kane ka kam pyntriem bad ioh ruh ban kurup noh ia ka suloi bala pyndonkam,” ong u ADSP u Prakash Medhi haba kren sha ki lad pathai khubor.
