Imphal, Naiwieng 17 : Haduh 31 ngut ki dkhot jong ki kynhun seng lehnoh bapher bapher kaba kynthup ia 17 ngut na ka kynhun KCP(PWG), 4 na ka UNLF, 6 na ka PREPAK, 3 na ka KYKL bad uwei na ka PREPAK (VC) kila wan ban pyndem noh wait noh hynnin ka sngi Balang ha ryngkat ki tiar ialeh bad ki kuli hakhmat u Myntri Rangbah (CM) ka jylla u N.Biren Singh ha ka jingialang kaba la long hapoh Banquet Hall jong ka 1st Battalion Manipur Rifles, Imphal.
Ki tiar kiba la wan pyndem da kine ki lehnoh ki kynthup ia ki suloi M16 rifles , AK56 rifles, .22 rifle, double barrel gun, 9mm pistol kynthup ia shibun bah ki kuli.
Na ka liang u CM ka Manipur u Biren Singh ula ai khublei sha kine ki dkhot halor ka jingwanphai mon sngewbha ka jong ki sha ka imlang ka sahlang da kaba ong ruh ba mine ki dkhot mynta ki don ia ka jingshaniah ha ki riti synsahr khadar jong ka ri India.
Kham hashwa, kata ha u bnai Naitung mynta ka snem, haduh 12 ngut ki dkhot jong ka kynhun seng lehnoh Liberation Tigers of Tribals (LTT) ka Manipur kila wan ban pyndem wait noh ia lade hakhmat u CM Biren Singh ha ka jingialang kaba la pynlong hapoh Banquet Hall.
Haba kdew halor ki skhim aijingiarap na ka bynta kine ki lehnoh kiba la wan pyndem wait ha kane ka jylla ka thain shatei lammihngi (Northeast) ia kaba la pynthymmai ha ka snem 2018, na liang u Biren Singh ula ong ba kito ki briew kiba la wan pyndem noh ia lade bad aiti noh ia ki tiar iapom ki lah ban ioh ia ki jingmyntoi lyngba katei ka skhim, kaba kynthup ia ka jingiarap kaba tang shisien ai, kaba long 4 lak tyngkat na ka bynta uwei pa uwei u dkhot.
Nalor ka stipen kaba T.6000 uwei u dkhot bad kiwei pat ki jingiarap na ka bynta kito kiba wan pyndem ryngkat bad ki tiar ialeh, na ka liang u CM ka Manipur ula ong ba kine ki dkhot bala pyndem wait kin shong hapoh ki ktem sah shipor na ka bynta lai snem kynthih.
Ha kawei pat ka bynta na ka liang u CM Biren Singh u kyntu ruh ia kiwei pat ki kynhun seng lehnoh ba kin wan pyndem noh ia lade bad ban iaid ha ka lynti kaba dei.
