Tura, Naiwieng 17 : U Myntri Rangbah ka Jylla Conrad K Sangma hynne ka sngi palei, ula sam ia ki cheque jong ka Payment of Ecosystem Services (PES) sha ki riew shimet ba shah jied bad ki Shnong jong ka Ri-lum Garo namar ka jingmih ban iada bad sumar ia ka mariang.
Ia kine ki Cheque la sam ha ka jingialang ba long ha District Auditorium, Tura, West Garo Hills District ha ka jingiadon ryngkat u Deputy Commissioner, u Chief Executive Member (CEM) ka GHADC bad kiwei kiwei.
Kane ka jingai jingiarap sha ki riewshimet bad ki Shnong ka dei kaba la leh lyngba ka prokram “Green Meghalaya -Grassroot level Response towards Ecosystem Enhancement and Nurturing”- kaba ka jingthmu ka long ban pynkhlain ia ki shnong ki thaw ba kin sumar ia ki khlaw ki bthap bad ba kin thung dieng ban pynjyrngam ia ki shnong ki thaw.
Haba kren ha ka jingialang, u Myntri Rangbah ula ong ba ki Shnong ki Thaw ha Nongkyndong ki dei ki nongri nongsumar ia ki khlaw ki btap ba da ki pateng la pateng bad pyntip ba ka Sorkar kala mang T. 50 klur na ka skhim Green Meghalaya na ka bynta une u snem mang tyngka ba mynta ban ai jingiarap pisa ha kaban iada ia ki jaka khlaw bad ki jingdon jingem ha ki.
250+ villages from across Garo Hills region received funds totaling ₹6 Crores from the Green Meghalaya Scheme.@byadavbjp @moefcc pic.twitter.com/bwzb8qnHQY
— Conrad Sangma (@SangmaConrad) November 17, 2022
Haba pynpaw ba ki jingktah jong ka jingkylla ka mariang bad ka suin bneng ka dei kaba la ioh kat shaba phai bad ba ki jaka khlaw ha ka thain kila nang stang, u Myntri Rangbah ula ong ba ka Sorkar kala pyrshang ban pynjyrngam biang ia ki jaka khlaw da kaba wanrah ia ki prokram bapher bapher kum ka afforestation, multi-purpose reservoir, springshed rejuvenation, cleaning drives bad kiwei kiwei ban pynkhie im biang ia ka mariang.
Haba pynpaw ba ki briew ki shaniah tylli ha ki khlaw, u Myntri Rangbah ula ong ba ka Meghalaya ka don haduh 76% ki jaka khlaw ha kaba 94% ki dei kiba long trai da ki Shnong ki thaw bad ki riew shimet katba tang 6% ki dei ki khlaw bala iada da ka Tnad Forest ka Jylla. Ula ong ba ka jingiashimbynta jong ki shnong ki thaw ka long kaba donkam bha ba pynlong ia kane ka prokram kaba jop.
“Namar kata, khnang ban lah ban ai jingiarap song pisa bad ka lad kamai kajih ia ki briew kiba iada ban sumar ia ki khlaw, ka Sorkar kala wanrah ia ka skhim ba kyrpang ka Green Meghalata, kaba dei ka jingsiew sha ki briew kibaiada ia ki khlaw habba kyrmen ruh ba kane kan pynshlur ia kiwei ruh ba kin khein kor iaka mei mariang da ka jingnang ban sumar naka bynta ka pateng ban wan” ula ong.
Haba pyntip ba ia kane ka skhim la bei tyngka ruh da ka World Bank lyngba ka Community-Led Landscape Management Program, ula ong ba ki trai jong ki jaka khlaw ba duna ia ka 5 hectare kin ioh ia ka jingkyrshan pisa na ka bynta san snem ka ba shong ruh kat kum ka jingheh jong ki jaka khlaw bad haduh 298 tylli ki Shnong ha Ri-Lum Garo kila ioh ia ka song pisa ba kot haduh T. 6 klur na ka skhim Green Meghalaya hynne ka sngi.
Ha kajuh ka por, u Deputy Commissioner ka West Garo Hills u Swapnil Tembe ula ong ba ka Green Meghalaya ka dei ka skhim kaba biang bha bad ula kyntu ia baroh kiba iadon ha ka jingialang ba kin pyndonkam bha ia ka pisa bad sha ka kam kaba dei kum ka jingthung dieng bad jingsumar ia ki khlaw ha ka thain.
Ha kane ka sngi, u Myntri Rangbah ka Jylla ula sam ia ki cheque sha ki nongioh ia kane ka skhim ha kane ka jingialang.
