Shillong, Naiwieng 17 : U Myntri ka Tnad Community & Rural Development Bah Hamletson Dohling hynne ka sngi palei ula buh ia u mawnongrim ban shna ia ka ophis ba thymmai jong ka Mawkynrew C&RD Block ha Mawkynrew.
Haba kren ha ka jingialang, u Bah Hamlet ula ong ba ki Ophis jong ki Block ki long kum ki jingkieng ba pyniasoh hapdeng ka Sorkar bad ki paidbah bad namar kata ka long kaab donkam ban pynbha ia ki jingtei bad ki jingdonkam ba kan lah ban ai jingshakri bha.
Ula pyntip ruh ba ka Sorkar kala mang pisa T. 120 klur ban pynbha ia ki 40 tylli ki Ophis jong ki Block hapoh ka Jylla bad T. 2.77 klur la mang tang ia kane ka Block ka ban sa sdang pyntrei noh shen.
U Myntri ula iaroh ruh ia ka jingtreikam jong ka Ophis ka Mawkynrew Block haba phai sha ka jingpyntreikam ia ki skhim bapher ka Sorkar Jylla bad Sorkar Pdeng. Ula ban jur ruh halor ka jingjop teikam jong ka Tnad C&RD khamtam haba iadei bad ka jingpyntreikam ia ka MGNREGS bad ka jingpynkhlain ia ki SHG hapoh ka Jylla ha kine ki khyndiat snem bala leit.
Kiwei pat kiba la kren ki kynthup ia u Myntri ka kam rep Bah Banteidor Lyngdoh, u SC Sadhu Director ka Tnad C&RD bad kiwei kiwei.
