Shillong, Jylliew 21 : Ka Khasi Hills Autonomous District Council (KHADC) ka la rai ban wanrah biang ha Iing Dorbar ia ka Bill ba thymmai kaba la tip kum ka KHAD (Social Custom of Clan Administration) Bill, 2020.
“Ngi la rai ban wanrah biang ia kane ka Bill ha ka Dorbar kaban long naduh ka 6tarik u Naitung na ka bynta ka jingmyntoi jong ka Jaidbynriew hi baroh kawei,” ong u Bah Titosstarwell Chyne haba kren bad ki nongthoh khubor hadien ba la wai ka jingialang jong ka Executive Commitee.
Shuh shuh u la ong ruh ba katei ka Bill kaba kin wanrah biang kadei hadien ba ka Select Committee ka la dep ban bishar bniah biang hadien ba u Lat u la phah pynphai biang ryngkat ki jingkynthoh.
“Kumta, hadien kane, ka EC ka la phah sha baroh ki MDC ba kin ai jingmut. Hynrei ym shym la don kiban kdew ei ei halor katei kaba mut ba ki mynjur beit,” ong biang u CEM.
