Shillong, Naiwieng 14: U Symbud Myntri Rangbah ka jylla u Bah Prestone Tynsong hynne ka sngi, ula pynbna ba ka sorkar jylla kan ai jingiarap T.10 Klur iaki Coperative Society khnang ba kin lah ban pynkhlain iaka kamai kajih jong ki.
U Bah Prestone ula pynbna ia katei haba kren kum u kongsan ha ka jingrakhe iaka 69th All India Cooperative Week Celebration 2022 kaba la long ha State Central Library,Shillong.
“Ka sorkar jylla kan ai jingrap T.10 klur iaki Cooperative Society kiba don haka jylla khnang ba kan long kum ka bai seng tang na ka bynta kito ki Cooperative Society kiba dang treikam bha hynrei kito ki bym treikam, kin ym ioh eiei bad sngewbha ban ym sngew eiei” ong u Bah Prestone.
Ula kyntu ia ki Cooperative Society ba kin treikam bha namar lyngba ka jongki yn lah ban aikam aijam ia kiba bun bad ka Cooperative Society kaba treikam bha mynta kadei ka Meghalaya Cooperative Apex Bank.
“Ngi iohi ba ki khun samla ki jong ngi, ki ia pyrta ha surok bym don kam bad ka don ka jingkyrduh kam, hynrei nga ong ia phi, ba lada phi ong sa kumno kumno ruh, ka jylla Meghalaya ka jong ngi, la ngi iakren iaka kyrduh kam kyrduh jam, ngi dang kham biang shibun shah lada ianujor bad kiwei pat ki jylla” ong u Bah Prestone.
Ula ong, ki don ki lad ki lynti kaba ki samla ki lah ban seng kam lajong bad ka sorkar jylla kala pyn treikam bun bah ki skhim na ka bynta ki khun samla kiba don iaki sap bapher bapher bad kumta ki samla kidei ban shimkabu ia kine ki lad khnang ba kin long kum kita kiba iohkam iohjam nangne shakhmat.
Ha kane ka jingrakhe iaka Cooperative Week la iadonlang ki heh ophisar ka jylla bad la wan iashimbynta da ki Cooperative Society na kylleng kiba la wan ban pyninam bad die ia ki mar ki mata, ki tiar ki tar bad kiwei kiwei ha katei ka taiew lehkmen ka jongki.
