Guwahati,Naiwieng 14 :U Myntri Rangbah (CM) ka Assam u Himanta Biswa Sarma ha ka 12 tarik mynta u bnai ula ong ba u khmih lynti ia ka jingwan pyniasoh shen jong kumba 1000 ngut ki dkhot nongmihkhmat ka Congress ha ka Seng BJP.
Haba kynthoh pyrshah ia ka party Congress, une u CM ka Assam ula ong ba ki 1000 ngut ki dkhot ka Congress kiba la vote ia u Shashi Tharoor ha kane ka ilekshon jied president kaba dang shu dep shen jong ka party ki dei tang ma ki ki briew kiba kyrshan ia ka synshar paidbah hapoh ka seng Congress.
Katkum ki khubor, u CM Sarma ula ong ba ka jingmih na katei ka ilekshon kaba hapoh ka Congress la dep ruh ban pynbna lypa wat hashwa ka jingniew ia ki vote.
Nalor kata u Sarma ula kynthoh ruh ia ka Congress halor ka jingjied ia u Mallikarjun Kharge kum u nongialam bathymmai da kaba ong ba u Shashi Tharoor ula dei ban jop na ka bynta katei ka post bad ba un pynbna ba ka synshar paidbah kala wan hapoh ka seng Congress.
Haba kynthoh pyrshah ia kane ka jingkam jong u CM ka Assam u MP ka Thiruvananthapuram u Shashi Tharoor ula ong ba kito kiba pynpaw ia ka jingshlur kin ym pyniasoh ia lade sha ka Bharatiya Janata Party, bad ula ong ruh ba tang kito ki bym nud ban iakhun pyrshah ki lah ban leh ia kiba kum kita.
U Mallikarjun Kharge ula shah jied kum u president ka seng Congress ha ka 19 tarik u bnai Risaw ba la dep.
