Guwahati, Naiwieng 14 :Ki khubor kila iathuh ba kala don ka jingther kuli hapdeng ka jaka khlaw ha ki bynta jong ka khlawUpper Dihing ha ka surok kaba pyniasoh ia ka Digboi-Pengeri kaba hap hapoh Pengeri police station hapoh Tinsukia district ka Assam.
Katkum ki khubor la iathuh ba ki kynhun lehnoh kila ther kuli pyrshah ia ka kali shipai ha ki bynta jong ka khlaw Upper Dihing ha Tinsukia district ha kaba kala mih ruh ka jingiather kuli markylliang kaba la neh kumba 10 minit.
Lah ban kdew ba hadien jong kane ka jingjia, ia kane lynti surok hapoh kane ka jaka khlaw la kerkut hadien ba ki heh shipai kila suba jur ba ki lehnoh ki dang bteng ban shong riehtngen ha kane ka jaka khlaw.
Ia baroh ki bynta jong kane ka khlaw la kerkut noh da ki shipai, hynrei kat haduh mynta hi kam shym la don kano kano ka jingiap briew.
