SHILLONG, Naiwieng 10: Ka Cathedral Parish Laitumkhrah hynne ka sngi ka la pynbna ban long noh iaka Procession lane ka jingiaid paidbah ki riew ngeit Balang Katholic ha ka 13 tarik u Naiwieng 2022 ha Cathedral Parish Laitumkhrah.
Haba kren sha ki lad pathai khubor u General Secretary ka Parish Pastoral Council u bah Barnabas Nongbah u la pyntip ba ia kane ka Procession yn sdang shwa da ka Mass bakhuid ha ka por 10 baje mynstep ha Kalbari bad yn pyniaid da u Archbishop Victor Lyngdoh bad bud sa da ka jingiaid procession ha ka por 1:30 nohsngi.
U bah Barnabas u la pyntip ruh halor ki jaka pynieng kali bala pynbeit na ka bynta kito kkba wan na ki thaiñ bapher bapher bad ia ka jingai award na ka liang ka EBIK hadien ka Mass bakhuid.
“Ngeit ba kane ka procession kan long kaba iaid beit iaid ryntih khlem kano kano ka jingwit namar la shu antad ba kin don palat 1 lak ngut tam ki paidbah na kylleng ka jylla bad na kiwei kiwei ki Jylla ki ban wan shim bynta ha ka 13 tarik mynta u bnai” la ong u bah Barnabas.
U bah Barnabas u la ong ba ia kane ka jingiaid paidbah la pynlong biang hadien ar snem ka jingwan lynshop ka khlam COVID-19 kaba la ktah ruh iaka jingleh niam jong ki riew niam bapher bapher hapoh ka jylla baroh kawei.
Haba iadei bad ka jingwan ki paidbah na kylleng ka jylla, u bah Barnabas u la pynbna ba baroh ki kali heh ne ki Boss kiba wan na ki thain Jowai kin pynieng ïa ki kali ha Madan Iewrynghep Fire Brigade, bad ki kali rit kila buh ban pynieng ha St. Edmunds skul, ki kali kiba wan na ki BHthaiñ Ri War, West Khasi Hills bad Ri-bhoi kin ieng ha hajan ka Civil Hospital, ki kali heh kiba wan na ki thaiñ Polo kin ieng ha MBOSE, DTO bad ki kali kin ieng ha NEEPO, ha St Mary’s, St Margaret skul.
