Shillong, Naiwieng 10: U MLA ka Mawlai Konstitwensi u Bah Process T Sawkmie ha ka sngi Balang ka 09 tarik u Naiwieng, 2022 u la plie ia ka Smart Class bad Computer Room jong ka Christ Church Morning School, Mawlai Syllaikariah ha ka jingdon ryngkat bah Alexander Syiem, president ka managing committee, u headmaster bah B. Lyngdoh, ki nonghikai, ki khynnah skul bad kiwei kiwei.
Haba ai jingkren u Bah PT Sawkmie u la pynpaw ia ka jingsngewkmen ba ka skul Christ Church ka ioh ia kane ka smart class bad computer room kaba ki la angnud la slem bah.
Kumta u la kyntu ia ki khynnah ban trei shitom bad ban pyndonkam hok ia kane ka smart class kaban kyntiew ia ka lawei jong ki. U la pyrto ruh lymda dei na ka sponsoring body ne ki riewngeit jong ka Balang kiba kyrshan ia ka skul kan ym long kumne kumba ka long mynta.
U la pynpaw ruh ia ka jingsngewnguh ba ka skul ka la khot sngewbha ia u ba un don bynta lang ha kane ka jingplie ia ka smart class.
Ha kane ka sngi la ioh ruh ia ka jingkren na u president ka managing committee u bah A. Syiem bad la sdang bad pynkut ia ka prokram da ka jingduwai.
Kiba la ai jingkren ha kane ka sngi ki la kitbok ruh ia u Bah PT Sawkmie ba un wanphai biang kum u MLA hadien ka ilekshon 2023.
