Shillong, Naiwieng 09 : U Myntri Rangbah ka Jylla Conrad K Sangma hynne ka sngi Balang ula ong ba ka Sorkar Jylla kan sa shim ia ki sienjam ba donkam ban shim haba pyntreikam ia ka jingbthah jong ka Election Commission of India (ECI) kaba iadei bad ka jingpynkynriah kam ia ki Ophisar shuwa ka elekshon MLA-2023.
“Kat kum ka jingpynbna bala phah da ka ECI, ngin sa shim ia ki sienjam ba donkam ban shim” ong u Conrad haba iakren bad ki nongthoh khubor.
Haba pynpaw ba kane ka kam ka dei kaba ju leh hashuwa ka elekshon, u Conrad ula ong “Kam don jingpher satia ha man ki elekshon, kane ka jingpynbna ka leit sha baroh ki Jylla bad ka dei kaba ju leh manka por ia kaba ngi hap ban bud hashuwa ban long ka elekshon”.
Haba kylli, u Myntri Rangbah ula ong ba kam shym pat don satia kano kano ka jingpyni dak ba ka Jylla ka kwah ban pynlong kloi ia ka elekshon.
“Ka elekshon kala don kumne hakhmut lait noh satang lada phim kwah ban rakhe ia ka Khristmas. Kane ka dei kawei pat ka bynta hynrei nga sngew ba ngi dei ban bud ia ka lynti ba ju iaid bad ngin ap iaka jingpynbna na ka ECI” ula ong.
U Senior Principal Secretary ka ECI u Narendra N Butolia ha ka 4 tarik Naiwieng ula ong “Ka Commission kala bthah biang ba ka jingpynkynriah ia baroh I Ophisar kiba dei pyniaid ne khmih ia ka elekshon dei ban leh kat kum ka jingbthah bad u Chief Secretary bad DGP ki dei ban ai ia ka kaiphod halor ka sienjam bala shim bad ban aiti ia ka sha ka Commission hashuwa ka 15 tarik u Nohprah”.
