Shillong, Naiwieng 09 : Ka Sorkar Meghalaya Democratic Alliance (MDA) hynne ka sngi Balang kala mynjur ban thaw ia ka Meghalaya State Education Commission, ka ban bishar bad ai jingmut ia ka Sorkar ha kaban wanrah ia ki jingpynkylla ia ka pule ka dangle hapoh ka Jylla.
Ia kane ka rai la shim da ka jingialang jong ka Kynhun Myntri ha kaba la pyntip ba ka Commission kan don haduh 4 ngut ki Dkhot ba kynthup ia uwei u Chairperson, arngut ki Nongai buit bad uwei u Secretary.
Ka jingtreikam jong ka Commission ka long eh ban ai jingmut ia ka Sorkar Meghalaya halor ki kam ba iadei bad ki skul bad College, ia ka rukom pyniaid, ka jinglong jingman jongki jaka pule, ka rukom ai iaka tulop, ka rukom pyniaid ia baroh kawei ka school bad college, ka rukom buh iaka jingkhein jingdiah bad ban thaw iaki lad ki lynti bad ki jingai jingmut kiba kongsan naka bynta ban wanrah iaka jingkylla haka pule puthi haka jylla khamtam ha kaba phai ruh sha ka NEP 2020.
Katei ka Commission kan peit ruh ia ki lad ki lynti ban pynbeit ia ka jingeh ha kaba iadei bad kajingsiew iaka tulop jong ki nonghikai kiba ioh iaka jingiarap tyngka naka sorkar bad ha kaba iadei ruh bad ki nonghikai sorkar.
Kan khmih ruh ia ki lynti jam ba ha kaba iadei bad ki mat jong ki nonghikai SSA, ka jingdon jong ki skul ki bym lah ban treikam bha, ki skul kiba la kyrhai ha ka jingdon jingem, ki skul kiba duna ha ka jingdon ki khynnah skul, ki skul ki bym don khynnah skul, ki skul kiba don khynnah tang hapoh 9 ngut bad ki skul kiba don tang iwei i nonghikai bad kumjuh ha kaba iadei bad ka jingeh jong ka jingbym don ki nonghikai ban hikai iaka ktien phareng khamtam ha ki skul kiba don ha khappud.
U Myntri Rangbah ka Jylla Conrad K Sangma ula pyntip ba ka Sorkar Jylla kala trei borbah bha ha kine ki saw snem tam ha ka kam pule dangle bad mynta kala sdang ban paw ka dak ba kala kham janai. Ula ong ba hapoh ka PGI score, ka NITI Aayog kala ithuh ba haba phai sha ki jingtei bad ki jingdonkam baroh jong ki jaka pule, ka Meghalaya kala wan ha ka kyrdan ba-ar ha ka Ri haba phai sha ka jinglah pynjanai ia ka pule ka dangle.
