Shillong, Naiwieng 09 : U Nongialam ka NPP bad MP ka Rajya Sabha Dr WR Kharlukhi ula buh dak jingkylli ia ka jingkam jong ka All India Trinamool Congress (AITC) ba ka khlain ha Ri-lum Garo.
“Kat kum ka jingtip jong nga, kim khlain satia kat kum ka jingkam jong ngi” ong une u MP bad President ka NPP-Meghalaya.
Kumba long mynta, ka AITC ka don 6 ngut ki MLA ha Ri-lum Garo bad baroh ki dei kiba phet na ka seng Congress.
U Dr Kharlukhi ula ong ba ka NPP kala trei shitom ban ioh ia ka obsolute majority ha ka elekshon 2023. “Ngi la pynkhreh ha baroh kawei ka Jylla ym tang ha Ri-lum Garo, ngi lah trei shitom ban ioh ia ka obsolute majority” ula ong.
Haba kylli halor ki jingiai kynnoh jong u Dr Mukul Sangma ia ka Sorkar MDA halor ki ishu bapher bapher na ki rynsan ialap elekshon, une u Nongialam ka NPP ula ong ba ka dei ka bynta jong ki kum ka Liang Pyrshah, kin iai kynthoh beit pyrshah ia ka Sorkar bad ka Party kaba don ha ka bor hynrei haba kut ki dei ki paidbah ki ban shim rai.
