Nongstoiñ, Naiwieng 8:U Nongialam Shnong ka Umriang Mawiamsyiem bad ka Mawblang Mawiamsyiem, kila kynnoh ba ki paidbah nongthep vote jong kine ki artylli ki Shnong, kila shah pynduh ia ka hok ban thep vote ha Jylla Meghalaya naduh u snem 2007 bad haduh mynta ym pat lah ban tip satia ia kaei ka daw.
Kine ki Nongialam Shnong ki dei u Jinarson Marak Rangbah Shnong ka Umriangkona bad u Histing Sangma uba dei u second President ka shnong Mawblang Mawiamsyiem haba iakren bad u nongthoh khubor Ka Shlem.
La iathuh ba kine ki artylli ki Shnong kiba hap hapoh u pud u sam jong ka West Khasi Hills District bad kaba hap hapoh ka Rambrai-Jyrngam Constituency.
Kine ki Shnong ki dei kiba hap hapoh ka jingsynshar jong u Syiem Phlowel Syiem, Syiem ka Hima Nongmynsaw Syiemship bad ki dei ruh kiba don ha khappud bad ka Assam. La iathuh ba kine ki Shnong ki dei kiba dang don ha ka jingshongsuk shongshngain bad kiba lait na ka jingiakajia pud jong ki artylli ki Jylla-Meghalaya bad Assam.
Kine ki Nongsynshar Shnong kila pynpaw ruh ia ka jingangnud bad thrang dik dik ba ka Sorkar Meghalaya kan ai biang ia ka jingithuh ia ki bad ban pynioh biang ia ka hok ban jied ia ki Nongmihkhmat na Rambrai –Jyrngam Constituency ki ban mihkhmat sha ka Iingdorbar Thaw Ain ka Jylla.
Kine ki Nongsynshar Shnong kila iathuh baka ka jingshah pynduh ki EPIC thep vote kala jia naduh u snem 2007 bad ia kane ka kam la kynnoh bala leh jubor da u MLA ba mihkhmat ia ka Rambrai-Jyrngam Constituency ha kitei ki snem.
Ia kane la pynsakhi da ka jingpyni ia ka EPIC kaba rim, kaba pyni shai ba ki dei ki nong Meghalaya bad kiba ju thep vote ha jylla Meghalaya.
Kat kum ka jingiathuh jong ki, kine ki artylli ki Shnong ki don kumba 150 tam ki tnum iing bad kumba 1000 ngut eiei ki paid nongshongshnong haba khein kyllum lang ha ka jingdon paid.
Halor kane ka jingjia, ka kyrtong jong ka TMC ka Aicifull M Musulman ka ban iakhun ia ka elekshon MLA 2023, kala kular ban sa iarap ban pynioh biang ia ka hok thep vote ia ki sha jylla Meghalaya.
