Guwahati, Naiwieng 07 : San ngut ki briew kila shah kem noh hadien ba la ioh ban kurup ia kawei ka saikil kaba la pyndonkam na ka bynta ban pyniaid iew ia ki pisa beain ha ki bynta bapher bapher jong ka South Kamrup hapoh Assam.
Baroh kine ki samla kiba la shah kem ha ryngkat ka pisa thok ki dei napoh Lakhimpur.“Hynnin ka miet, ki bor pulit ka Chhaygaon ha kaba nyngkong kila pynlong ka jingkhynra hapoh ka jaka iew Chhaygaon bad kem noh ia uwei u samla ia uba la tip kyrteng kum u Rafiquddin ha kaba la ioh ban kurup ia ka pisa thok kot 500 kaba don baroh 5000 tyngka. Lyngba ka jingphla ka jong u, ki pulit kila bteng ia ka jingkhynra bad ioh ban kurup ruh ia ka mashin bad kiwei pat ki tiar ba la pyndonkam ha kaba shna ia kine ki pisa thok napoh kawei ka iingwai ha Bangara ha kaba kila kem noh sa ia sawngut kiwei pat. Kine ki briew kiba la shah kem ki dei kiba la tip kyrteng kum u Abdul Hanif, Nurul Haque, Abdul Hashim bad u Rahim Ali,” ong u heh pulit.
Shuh shuh na kine ki briew la ioh ruh ban kurup ia hynniew tylli ki mobile phone.Ka jingtohkit pyrshah ia kine ki briew kala iaid shakhmat da ki bor pulit ka Chhaygaon.
