Shillong, Naiwieng 06 : Ka jingioh pynlong ia ka 2nd North East Olympic Games 2022 kan ai shisha ia ka Meghalaya ia ka jingshemphang kaba lah ban pyndonkam haba pynlong ia ka 39th National Games, pynpaw u Chef de Mission ka kynhun ialehkai ka Manipur ia ka jingsngew.
U M Rajendra Singh ula ai khublei ia ka Meghalaya halor ka jngioh pynlong ia ka NED Olympic Games ba-ar. Kane ka lympung ba nyngkong kala long ha u snem 2018 ha Manipur, ka Jylla kaba la ioh pynlong ruh ia ka National Games.
Ka Manipur ka dei ka lahduh ha u snem 2018 bad u Rajendra Singh u khmih lynti ba ki 449 ngut ki nongialehkai ka Jylla kin lah biang ban ioh ia kane ka nam sa shisien.
“Ka Manipur ka dei kaba ieid ia ki jingialehkai bad ngi la pynmih ia bun ki nongialehkai International kynthup 25 ngut kiba la ialehkai Olympics” ula ong haba bynrap “Nga ngeit ba ki rang ba ki thei ialehkai jong ngi kin pynneh ia ka nam Champion”
U Rajendra Singh ula kular ruh ba ka Manipur ka long kaba la khreh ban kyrshan ia ki nongpyniaid b aka NEOG 2022 kan long kaba jop haba aimynsiem ia ka Meghalaya ban tem ia ki jingeh baroh.
“Khlem ki jingeh, ka Games kam dei kaba lah ban pynlong. Kane ka dei kaba nga la iohi ha kylleng ki ri ka pyrthei. Ki don beit ki jingbym biang wat ha ka Olympics, Commonwealth bad National Games. Kine ki jingtynjuh kin iarap ia ka Meghalaya ban pynkhreh ia ka jingpynlong ia ka National Games bad nga ai kublei bad kitbok ruh halor kane” ula ong.
