Nongpoh, Naiwieng 04 : U MP ka Lok Sabha ka Shillong ma Vincent H Pala, hynne ka sngi thohdieng, ula plie paidbah ia ka Iingdorbar ba thymmai jong ka shnong Mawtari Myrdon haba ai jingiaroh ia ki nongshongshnong halor ka jingpdiang kylluid mynsiem ia ka jingwan ki kam pynroi hapoh ka Shnong.
Ia kane ka Iingdorbar la tei ha ka jinglut kaba kot palat T. 18.50 lak lyngba ka skhim SRWP 2016-17 bad T. 10 lak naka MP Lad jong u snem 2021-2022, 2022-2023.
Haba ai jingkren ha ka jingialang, u Ma Vincent ula ba kane ka dei ka sngi sah jingkynmaw ia ka shnong bad ia ki nongshongshnong kiba la iatreilang ha kaban lah pyndep pura ia kane ka Iingdorbar ban iathir iatai ia ki kam shnong bad khamtam ban pyntyllun ia ki kam pynroi hapoh ka shnong.
Une u MP ula ai ruh ka jingiaroh ia u BDO, u Contractor kiba wat hapdeng ki jingeh ba bun, kila lah ban pyndep ia kane ka jingtei kaba long kongsan eh ha ka jingtreikam jong ka Dorbar Shnong.
U ma Vincent ula buh ruh ka jingkyntu ia ki Nongshongshnong ba ki dei ban iatreilang bad kyrshan ia ki Nongialam Shnong ha kiba bun ki liang khnang ba kum ka shnong ka thaw kan nang sakhi ia ka jingwan jong kiba bun ki kam pynroi bad ka jingkiew ka shnong ha baroh ki liang.
Kiba la iadonlang ha kane ka sngi ki kynthup ia u MLA barim ka Umsning Dr. Celestine Lyngdoh, Bah Adrian L Chyne, Bah u Raja Brahma, BDO ka Umsning C&RD Block, u Bah Bipul Thangkhiew, President ka RBYF, u Bah Rocky Marwein, President ka UBCC, Bah BS Nongphlang, bad Rangbah Shnong ka Mawtari Myrdon.
