Shillong, Nailur 27: U Chief Executive Member (CEM) ka Khasi Hills Autonomous District Council (KHADC) hynne ka sngi ula plie paidbah ia ka ïing skul ba paka jong ka Village Durbar Higher Secondary School, Swer kaba la pyntrei naduh ka por ba u dang long kum u MLA ha snem 2015.
Kum ban shu kdew ia kane ka ïing skul ha shnong Swer kaba hap ha Khatarshnong – Laitkroh C&RD Block la tei ha ka mang tyngka kaba long 2 klur tam lyngba ka Human Capital Development Project jong ka Asian Development Bank.
Ha kane ka sngi nalor u Bah Titos kum u kongsan la ia donlang ruh da ka Kong M Lyngwa, DSEO East Khasi Hills, u Bah D Mawñiuh, Principal, ki nongialam shnong, ki dkhot ka Managing Committee, ki kmie ki kpa lem ki khynnah skul.
Haba pynkynmaw ia ka dur ka dar ba i sangsot ha ki snem kiba mynshwa bad nujor bad kaba long mynta, u Bah Titos u la ong ba u dang angnud shuh shuh ba ka skul kaba la kiew mynta sha ka kyrdan Higher Secondary ha ka subject Arts kan ïoh sa kiwei pat ki subject kum ka Science bad Commerce ka ban long ka jingkyrkhu ia ki nongshong shnong ka thaiñ.
Halor ka jingangnud ban pynheh shuh shuh ia ka ïing skul bad ki kamra klas, u Bah Titos u la kular ban noh synñiang shuh sa 15 lak tyngka. Une u MLA barim ka Sohra u la ong ruh ba kano kano ka jingthrang jingangnud kan urlong beit da ka jingïatreilang.
