Shillong, Nohprah 08 : Ka Khasi Students; Union (KSU) kala kynmaw burom ia ka lyngkhuh sngi iap ba 31 snem jong u Nongialam balah khlad Bah Bull Lyngdoh haba iaroh ia ki synniang ba ula ai na ka bynta ka Jaidbynriew.

“Mynta ka sngi ka pynkynmaw ia ngi ia ka jinglen lade ban shakri ia ka Jaidbynriew. Ngi kynmaw ia ka jingaiti lut jong u Bah Bull Lyngdoh ban synniang sha ka jaidbynriew lyngba ka Khasi Students Union” ong u President ka KSU Bah Lambokstar Marngar.

U Bah Lambok ula pynkynmaw ia ki jingialeh jong u Bah Bull ban iakhun pyrshah ia ka jingrung kyrthep ki mynder hapoh ka thain wat hapdeng ki jingshah kynthoh ba laiphew jait. “Ki don ki briew kiba la kynthoh jur bha ia ki lynti bala shim da u Bah Bull Lyngdoh ha katei ka por. Hynrei, ynda um shym don shuh hangne, ki briew ki la sngewthuh ba ka eh shibun ban ioh nongialam kum ma u” ula ong.

Haba kyntu ia ki dkhot ka KSU ba kin iai bteng ban iakhun na ka bynta ka jingshngain bad jingiada ia ka Jaidbynriew, u Bah Lambokstar ula ong “Haba ngi shim ia kino kino ki mat iakhih, kin don beit kito kiba kynthoh pyrshah ia ngi, hynrei ngim dei ban pynsngap ia kum kine ki jingkynthoh namar ka kamram jong ngi ka long ban pynbteng ia ka jingiakhun”.

Ula pynpaw ruh ia ka jingdonkam ki ain kiba treikam bha ban iada ia ka Jaidbynriew bad ong “Ka Sorkar kala ong ba ym dei ban shim ia ka ain ha ki kti jong ngi, hynrei ngi kwah ban ong kane : Ia ka jingpyrshang jong ngi, ka lah ban shah khein beain da ka Sorkar hynrei na ka bynta ka Jaidbynriew, ka dei ka ain ka ban iada bad pynthikna ia ka jingshngain bad jingiada”.

U Bah Lambok ula kyntu ia ki dkhot ka KSU ba kin iatylli bad iai bteng ia ki jingialehkai jong ki na ka bynta ka jingshngain bad jingiada ia ka Jaidbynriew bad ong “Nga kyntu ba phi dei ban long ka ain, pynlong ia ki jingtalasi na ka bynta ka jing shngain bad jingiada ia ka Jaidbynriew. Ngi dei ban iatylli man ka por”.

Ki Nongialam bad ki dkhot ka KSU kila iashimbynta ha ka jingiabuh syntiew ha u mot sahnam jong u Bah Bull Lyngdoh ha ka jingiadon lang ki bahaiing hasem jong une u nongialam uba la khlad noh. La pynlong ruh ia ka jingsngap jar ba shi minit kum ka dak ban kynmaw burom ia une u nongialam ka seng.