Tura, K’lyngkot 18 : Ka kynhun ialehkai ki thei U-18 ka East Khasi Hills kila pynliem suk ia ka South West Khasi Hills daka jinglah thep haduh 5-0 kol, ha ka jingiakhun semi phainal jong ka 5th Meghalaya Games ba long ha PA Sangma Stadium, Tura hynne ka sngi Palei.
Kane ka jingiakhun kala pyni ia ka jingkhlain bor jong ka East Khasi Hills naduh kaba sdang, kaba la ioh ban thep ia ka kol ba nyngkong tang hapoh ka 9 minit lyngba ka nongialehkai ba hapdeng madan ka Melaribha. Namar ka jingialehkai bha, ka kynhun kala ioh ban thep biang ia ka kol kaba 2 tang ha ka minit ba 28 lyngba ka samla I Khongsit bad ioh tam da 2-0 kol ha ka kylla step.
Haba wan phai sha ka kylla miet, ka EKH kala pyniaid ia ka jingialehkai khlem da ailad satia ia ki thei ialehkai ka SWKH ban ioh bol bad ha ka minit ba 54, la ioh ban thep biang sa kawei ka kol lyngba ka samla I Khongthaw.
Ka samla I Khongthaw kala ioh biang ban thep sa kawei ka kol ha ka minit ba 61 bad ym slem ia kane, kala ioh biang ban thep ia ka kol hattrick ha ka minit ba 68, arminit shuwa ban kut ka jingiakhun.
Da kane ka jingjop, ka East Khasi Hills kan hap ban iakhun mynta pyrshah ia ka Ri-Bhoi ha ka phainal ban ioh khur ia ka takma ksiar bad long ka champion ha kane ka division.
Ha kawei ka liang, ka Eastern West Khasi Hills kan hap iakhun pyrshah ia ka South West Khasi Hills ban ioh khur ia ka takma rnong jong ka Meghalaya Games, ka ban long la sngi Thohdieng.
