Pynliem ka Ri-Bhoi ia ka EKH
Tura, K’lyngkot 19 : Ka Ri-Bhoi bad West Jaintia Hills kin iaknieh mynta ia ka takma ksiar ne ka lam lahduh jong ka U-18 Boy’s Football Division ka 5th Meghalaya Games, ka ban long ha PA Sangma Football Stadium.
Kine ki ar kynhun kin iakynduh ha ka phainal hadien ka jingjop ia ki semi phainal ba long ha ka sngi Palei. Ka Ri-Bhoi kala pynliem ia ka kynhun ba khlain ka East Khasi Hills da 2-1 kol.
Ka Ri-Bhoi kala sdang ia ka jingiakhun da kaba pyni ia ka jingkhlain naduh kaba sdang bad tang haka minit ba 3, kala ioh ban thep ia ka kol ba nyngkong lyngba u samla Fairwin Nongkseh. Tang hadien 3 minit, kala ioh ban thep biang sa shikol kaba wan lyngbau samla Melver, kaba pynlong ia ka kynhun ban tam 2-0 kol ha ka kylla step.
Haba wan phai sha ka kylla miet, ka kynhun ialehkai ka East Khasi Hills kala iakhun dohiap bad sdang ban ioh bat bha ia ka bol bad la sakhi ia kane da ka jingpoi ka bol jan baroh 15 minit jong ka kylla miet sha ka liang ka Ri-Bhoi hynrei kam shym la ioh pat ban shut sha kol.
Hynrei dei ha ka minit ba 78 ba ka kynhun ka EKH kala ioh ban pynphai ia shikol bad khlem lah shuh ban pynkylla ia ki lad ba ka ioh sha ka kol.
Da ka jingjop ba 2-1 kol, ka kynhun ialehkai ka Ri-Bhoi kan ap ia ka phainal ka ban long mynta ka sngi Thohdieng.
Ha kawei pat ka semi phainal, ka West Jaintia Hills kala pynliem ia ka West Garo Hills da 2-0 kol bad kine ki kol kila wan ha ka minit ba 14 jong ka kylla step lyngba ka freekick jong u samla Dawansalanmi Malang uba la shut n aka jingjngai ba 20 yard bad ka kol jong u Tiros Kyndait uba la ioh thep ha ka minit ba 60 jong ka kylla miet.
Ka East Khasi Hills mynta kan iakhun pyrshah ia ka West Garo Hills ban iaknieh ia ka takma rnong bad kane ka jingiakhun kan long hi mynta ka sngi ha PA Sangma Football Stadium.
