Shillong, K’Lyngkot 18: Ka Deputy Commissioner ka East Khasi Hills, ka Kong RM Kurbah kala kyntu iaka Voice of the People Party (VPP) ban nym pynlong iaka jingiakhih hakhmat ka Secretariat namar ba don ka jingialang 71st plenary session jong ka North Eastern Council (NEC) ha Shillong haka 19 tarik mynta u bnai.
Ka Plenary Session jong ka NEC ka dei kaban pyniaid da u Myntri ka tnat kam pohïing ka Sorkar Pdeng u Amit Shah haka jingdon lang u MoS DoNER, ki Lad bad Myntri Rangbah ki Jylla ka thain shathei lammihngi (North East).
Ka DC kala pynkynmaw ia ka shithi haka 12 tarik mynta u bnai, kaba pynjari daka kyndon Section 144 CrPC ban mana iaki jingiaid paidbah, lane kino kino ki jait jingiakhih hapoh 200 meters jong ka Main Secretariat building, Additional Secretariat bad ka Raj Bhavan.
Ka DC kala kdew ba ka jingialang Plenary Session jong ka Ministry of DoNER kadei ka prokram jong ka Sorkar India ban iakren bad ban shim rai halor ki Polisi ban donkam naka bynta ka thain shathei lammighngit (North East).
“Namar ka long kaba donkam iaka Jylla Meghalaya ban pyni baka jinglong jingman bad ka jingsuk kaba biang tam naka bynta kum kine ki program, kum ka dak ban pynti iaka jingkiew shakhmat ka Jylla. Kum ka Jylla kaba ngeit haka shong suk shong shngain, kum kine ki jingiakhih ka pynpaw ia ka dak kaba sniew iaka Jylla hakhmat baroh kawei ka Ri bad ka thain” kala ong.
Hynrei naka liang ka VPP kala rai beit ban iaid shakhmat ban iakhih hakhmat ka Main Secretariat haka 19 tarik mynta u bnai ban dawa naka Sorkar ban thungkam biang iaki 3 ngut ki ophisar ka Lokayukta.
Ia kane ka pynbna da u VPP general secretary u Bah Ricky AJ Syngkon haka 18 tarik mynta u bnai kum ka jubab iaka shithi jong ka DC.
