Tura, K’lyngkot 18: Ka sngi ba saw jong ka 5th Meghalaya Games kala sdang hynne ka sngi Palei da ka jingialehkai Table Tennis kaban khring bha ha Tura Indoor Stadium, Hawakhana, Tura.
Ka Table Tennis kan sakhi ia ka jingiakhun ki 31 ngut ki nongialehkai na ki 4 tylli ki District- ka East Khasi Hills (EKH) kaba don 12 ngut ki nongialehkai, ka West Garo Hills (WGH) kaba don 8 ngut, ka Ri-Bhoi kaba don 4 ngut bad ka South Garo Hills (SGH) kaba don 3 ngut.
Ban pynitynnad shuh shuh ia ka jingialehkai ka dei ka jingiashim bynta ki lai ngut ki nongialam bala rangbah kiba kynthup ia u Bah Gilbert Sun uba la 66 snem, Pynlang Sohtun ba 56 snem bad Paokho Tinhang Haokip ba 55 snem ka rta, kiba dei baroh na East Khasi Hills.
Ka East Khasi Hills kaba don bun eh ki nongialam, kan sei madan ia 11 ngut ki National Player bad u Sandeep Kumar (Men) un dei u nongialehkai uba paw duh, uba dang mihkhmat dang shen ia ka Meghalaya sha ka Senior National, Haryana bad ioh takma ruh ha ka North East Olympics.
Ka West Garo Hills ka dei haduh 7 ngut ki National Player bad kiba paw eh ki dei ka Di Toomi Velerie Ch Momin (Women), kaba iakynduh ha ka Senior National kaba long ha Haryana.
Ka jingialehkai ka dei kaba la phiah ha ka Men’s Singles, Women’s Singles, Men’s Doubles, Women’s Doubles, bad Mixed Doubles.
Ka kylla ba nyngkong jong ka jingiakhun kan long ha ka sngi Palei bad ka phainal kan long ha ka sngi Thohdieng.
