Nongstoiñ, Nohprah 9: U bah K.P.Pangñiang President rangbah ka HSPDP, u la ong ba hadien ba u la wanphai na ka jingїalang kaba la long ha Tura, na ka liang ki nongїalam ka GSMC bad kiwei kiwei ki kynhun kiba la їadon lang hapoh ka shatri jong ka National Federation of News State, ki la pyntip ha u ba ki kwah ban їakynduh biang sa shisien ban їatai sani halor ki mat kiba donkam ha shuwa ba kin leit aiti sha Lok sabha ban pynsngew sha ka ri India halor ki mat jingdawa.
U la ong ruh ba kitei ki para dkhot kiba la don hapoh ka lama jong ka NFNS, ki la pyntip ruh ba ki kwah ban pynlong їa katei ka jingїakynduh lang jong ki ha kano kano ka jaka kaba hap hapoh Khasi Jaiñtia Hills, hynrei kam dei pat ha ka Nongbah Shillong.
Hadien ba ki la pyntip їa kata, na ka liang ka HSPDP ka la pynbeit ba їa katei ka jingїakynduh lang kin pynlong ha ka 12 tarik mynta u bnai ha ka shnong Mawphanlur, kaba dei kawei na ki jaka jngohkai ba itynnad bad kaba la biang ki jaka sah na ka bynta ki ba wan sah miet.
Ka dei ruh ka shnong ha kaba la tei їa u mot sah jingkynmaw їa u (L) Maieit Hopingstone Lyngdoh u nongprat lynti halor ka jingdawa jylla la ka jong kata ka Khasi Jaiñtia State.
