Shillong, Nailur 30 : Ka Sorkar Assam-Meghalaya kila shim rai ban weng noh ia ki pyrton Pulit na ka thain Khanduli-Psiar kaba don hapdeng ka jingiakajia pud bad ban buh noh da ki CRPF ban pahara ia ka thain, khnang ba kan nym don ka jingpeit shiliang khmat haba pynneh ia ka shongsuk shongsain.
Ia kane la pyntip da ki Myntri Rangbah ka Assam-Meghalaya Himanta Biswa Sarma bad Conrad K Sangma hadien ka jing ialang iakren pynbeit pud ba long hynne ka sngi Saitjain ha Guwahati.
Haba kren sha ki lad pathai khubor, u Himanta ula pyntip ba dang shen ki Pulit ka Assam kila leit buh ia ka ktem Pulit ha Khanduli bad hakhmat kane kane ka ktem Pulit, ka Meghalaya ruh kala buh iala ka jong ka ktem Pulit kaba pynlong kum ka jingiapynibor markhmat.
“Kumta ngi la rai mynta ka sngi ba ki Pulit ka Assam kin buh noh da ki CRPF ha kane ka Outpost bad ka Meghalaya ruh kan pynkynriah noh ia ka ktem Pulit kham pajih khnang ba kan don noh da ka kynhun pahara ka bym iashah liang” ong u Himanta.
“Ngim kwah shuh ba ki paidbah kin iohi ia ki Pulit ka Assam ne ki Pulit ka Meghalaya ha ka jaka ba hap hapoh ka jingiakajia” ula bynrap.
